Galicia Ártabra Digital Noticias de Ferrol y la comarca de Ferrolterra.
O alcalde Bernardo Fernández Piñeiro mantivo unha xuntanza coa directora xeral de Estratexia Industrial e Solo Empresarial, Margarita Ardao. O obxectivo é a creación de algo máis de 200.000 metros cadrados de solo industrial para que novas empresas se trasladen ao concello.
O Concello de Pontedeume reúnese coa Dirección Xeral de Estratexia Industrial e Solo Empresarial da Xunta de Galicia para avanzar no desenvolvemento de novo solo industrial.
A directora xeral Margarita Ardao mantivo unha xuntanza co alcalde Bernardo Fernández Piñeiro para abordar as posibilidades de desenvolver solo industrial neste municipio e para tratar as medidas ao respecto impulsadas pola Xunta.
Fernández Piñeiro destacou na reunión “a necesidade de colaboración entre institucións para promover accións que repercutan positivamente no conxunto da cidadanía”.
O obxectivo é a creación en Pontedeume de algo máis de 200.000 metros cadrados de novo solo industrial para permitir que novas empresas se trasladen ao concello.
A directora xeral trasladoulle ao rexedor a estratexia da Xunta para facilitar o asentamento de novas empresas en Galicia e ampliar as que xa están instaladas, a través, entre outras cousas, de desenvolver solo industrial nos concellos que teñen necesidade e onde as empresas están esperando para poder asentar as súas industrias.
Nesta liña, sinalou que o Executivo autonómico puxo en marcha figuras de creación de solo, como é o caso da Zona de Aceleración de Proxectos Empresariais e Solo (Zapes), co obxecto de dar axilidade e facilidade a aqueles proxectos que precisan solo de maneira urxente.
Tamén trataron a figura das Zonas industriais rurais (ZIR), pensadas para actividades industriais de menor envergadura localizadas en áreas rurais con necesidades de solo. Estes mecanismos teñen o obxectivo de acadar un desenvolvemento industrial homoxéneo en toda Galicia.
