Galicia Ártabra Digital Noticias de Ferrol y la comarca de Ferrolterra.
Alumnado de terceiro da ESO do colexio do Feal en Narón, desprazouse ao Concello, acompañado de persoal docente, para asistir a un pleno escolar impulsado a través da Escola de Participación Cidadá de Narón e integrado na materia de Oratoria. A alcaldesa, Marián Ferreiro, e a concelleira de Ensino, Olga Ameneiro, recibiron aos menores no salón de plenos, onde se desenvolveu a actividade, na que se plantexaron unha serie de propostas por parte do estudantado.
Cinthya, Ainara, Carla, Irene, Gael, Brais, Hugo, Benja, Antía, Berna, Cris e Manuel foron os protagonistas da convocatoria, na que plantexaron diversas cuestións divididas en catro bloques. O colexio do Feal, a Casa da Mocidade, o transporte urbano e a implicación da mocidade foron os asuntos sobre os que conversaron coa alcaldesa e a edil de Ensino, ás que plantexaron a situación actual nalgúns ámbitos e para as que realizaron algunhas suxestións.
As representantes do goberno local tomaron nota dos asuntos tratados e respostaron a todas as cuestións plantexadas polos escolares, aos que animaron a participar activamente neste tipo de espazos e nas diferentes actividades impulsadas dende o Consistorio e dirixidas a mozas e mozos da súa idade.
Os escolares, pola súa banda, agradeceron a oportunidade que se lles brindou dende o Concello para realizar este pleno, coincidindo coa alcaldesa na importancia de escoitar á mocidade para participar no futuro da sociedade. Ao remate da convocatoria a alcaldesa e a concelleira entregáronlles unhas medallas, unha pulseira institucional e un diploma, agradecendo a súa participación nesta actividade e as súas aportacións.
