Galicia Ártabra Digital Noticias de Ferrol y la comarca de Ferrolterra.
Esta formación presencial e gratuíta está dirixida ao profesorado das escolas da Comarca de Ferrolterra e aos pais, nais ou titores e titoras, a través das Escolas de Familia.
A Cátedra de Protección Civil e Xestión de Emerxencias, adscrita á Facultade de Ciencias do Campus Industrial de Ferrol, puxo en marcha a “Formación para unha cidadanía responsable e resiliente” co obxectivo de elaborar, en colaboración co profesorado dos centros de educación infantil e de primaria da Comarca de Ferrolterra material pedagóxico sobre auto-protección e de poñelo en práctica nas aulas baixo o paraugas da Universidade da Coruña (UDC) e máis da Mancomunidade de Concellos da Comarca de Ferrol.
Entre os obxectivos desta formación presencial e gratuíta que xa está a recibir tanto o profesorado dos centros de ensino infantil e de primaria de Ferrolterra como os pais e nais, a través das Escolas de Familia, figura a necesidade de integrar contidos de auto-protección e comportamentos seguros nas escolas; de dotar ao profesorado dos coñecementos necesarios para impartir este tipo de contidos; de mellorar a formación do alumnado en cuestións de primeiros auxilios, prevención de incendios ou mobilidade segura, así como o feito de lograr adaptacións dos principios xerais de actuación de emerxencias para o estudantado con Necesidades Específicas de Apoio Educativo (NEAE) presente nas aulas, entre outros.
O Centro de Formación e Recursos de Ferrol (CFR de Ferrol) e o Centro Rural Agrupado de Narón (CRA de Narón) acolleron, no mes de marzo, a “Formación para unha cidadanía responsable e resiliente” impartida polo coordinador da Cátedra de Protección Civil e Xestión de Emerxencias, Daniel Lorenzo, polo coordinador de Seguridade do Concello de Ferrol, Santiago Troitiño, e máis polo xefe dos Bombeiros de Ferrol, Enríquez Suárez, así como por outras persoas voluntarias. Entre o público asistente, profesorado e integrantes dos equipos de dirección de diversos centros de ensino de infantil e de primaria da Comarca de Ferrolterra, Eume e Ortegal.
Do mesmo xeito, no marco das reunións das Escolas de Familia, tamén se impartiu, o pasado 23 de abril, na Escola do Val de Narón, esta formación impulsada pola Universidade da Coruña (UDC) e máis pola Mancomunidade de Concellos da Comarca de Ferrol, a través da Cátedra de Protección Civil e Xestión de Emerxencias. Este luns, 28 de abril, será a quenda dos pais, nais ou titores e titoras da Escola de Domirón, tamén no concello de Narón.
Todos aqueles centros de ensino infantil ou primario da Comarca de Ferrolterra interesados en optar a esta formación poden solicitado enviando un correo electrónico coordinador@catedraemerxencias.org ou ben chamando ao 630 624 999. As solicitudes xestionaranse por rigorosa orde de inscrición. Esta formación, de carácter presencial e gratuíto, seguirá vixente durante todo o curso académico 2025/26.
Adscrita á Facultade de Ciencias do Traballo do Campus Industrial de Ferrol
A Cátedra de Protección Civil e Xestión de Emerxencias, promovida pola Universidade da Coruña (UDC) e máis pola Mancomunidade de Concellos da Comarca de Ferrol, naceu en novembro de 2019 co obxecto de unificar coñecementos e criterios para dispoñer de documentación científica sobre emerxencias e protección á hora de elaborar, por exemplo, ordenanzas municipais ou protocolos de actuación ante determinadas situacións.
A Cátedra, dirixida polo profesor Moisés Alberto García e coordinada por Daniel Lorenzo, está adscrita á Facultade de Ciencias do Traballo do Campus Industrial de Ferrol.
