Galicia Ártabra Digital Noticias de Ferrol y la comarca de Ferrolterra.
A alcaldesa de Narón, Marián Ferreiro, participou xunto cos integrantes do equipo de Educación Viaria do Concello, Pedro Caneiro e Sonia López, nunha videoconferencia coa alcaldesa de Ciudad Heredia (Costa Rica), Ángela Aguilar, a promotora social da localidade, Michelle Rodríguez e a xornalista Marjorie Chacón para establecer unha primeira toma de contacto sobre o protocolo de irmanamento e cooperación entre ambos municipios.
Un acordo que, tal e como recordou Ferreiro, establece unha cooperación entre Narón e Ciudad Heredia para establecer programas de colaboración, intercambios en varias áreas relacionadas con programas de seguridade e educación viaria, infraestructura viaria, cultura, mobilidade segura, convivencia e seguridade cidadá… durante un período de catro anos.
A rexedora local de Narón destacou a importancia de que o traballo realizado dende a cidade poida axudar a outras como neste caso Ciudad Heredia, cunha poboación de máis de 550.000 habitantes. “Temos un equipo de Educación Viaria digno de merecer todo o noso recoñecemento polo seu traballo e é un pracer poder intercambiar experiencias e aprendizaxe cunha cidade como a vosa”, apuntou Ferreiro.
Pola súa banda, a alcaldesa de Ciudad Heredia asegurou que “dende o goberno local de Heredia é un honor poder asinar este irmanamento con Narón, unha cidade da que xa aprendemos moito e que nos permitiu implementar obradoiros, actividades, os corredores activos en colexios… facendo máis atractiva a educación viaria para nenos”.
Ángela Aguilar avanzou que “continuaremos levando a cabo máis iniciativas porque aquí a parte peonil está moi cuestionada, ao estar a xente sempre buscando a ampliación de estradas. Nós precisamos un cambio educacional e cultural nese senso, que nos permita tamén priorizar o transporte público sobre o privado e xerar, en definitiva, unha cultura de cambio”. A rexedora local de Ciudad Heredia pechou a súa intervención agradecendo ao Concello de Narón “o voso apoio neste tipo de iniciativas” e, a modo de exemplo, destacou que últimamente fortaleceron o proceso de igualdade e inclusión da cidade cun incremento dun 64% no orzamento para iniciativas de ámbito social.
