Clausura en Narón do I Laboratorio de Apoderamento LGBT+en Ferrolterra

As concelleiras de Ensino, Olga Ameneiro, e Igualdade, María Lorenzo, presenciaron no Auditorio municipal o acto de clausura da primeira edición do Laboratorio de Apoderamento LGBT+ en Ferrolterra, que consistiu nun encontro participativo ao que acudiron tamén traballadoras da cooperativa Rexenerando, promotora do proxecto, a Deputada de Igualdade, Soledad Agra, como representante da administración financiadora, técnicas e concelleiras das áreas de igualdade de Fene, Ferrol, Narón, Neda, San Sadurniño e Valdoviño.

Ademais, contou con representación de estudantado e docentes dos centros educativos participantes nesta primeira edición: o IES de Fene, o IES Catabois, o IES Terra de Trasancos, o IES Fernando Esquío e o CPI San Sadurniño e CPI Atios. O espazo, que se desenvolveu entre as 11:00 e as 14:00 horas, serviu tamén para seguir tecendo rede e avaliar o feito.

Tras a presentación do equipo que desenvolveu a acción educativa, tivo lugar unha dinámica na que os axentes de cada territorio se sentaron de maneira independente para coñecer mellor as propostas do estudantado para a incorporación da perspectiva da diversidade sexual nos seus territorios, e para valorar se algunha delas pode ser integrada nas políticas locais ou a acción do centro educativo.

Despois da merenda, un segundo espazo serviu para avaliar por círculos o traballo feito, recollendo apreciacións que poidan orientar as vindeiras edicións do LAB.

En canto a Naron, participaron dous grupos de cuarto de ESO do IES Terra de Trasancos, un total de 58 persoas, representadas hoxe no acto. A convocatoria desenvolveuse na cidade entre os meses de outubro e novembro deste ano, con dúas sesións por grupo/aula. Na súa edición 2024, participaron directamente nos obradoiros do LAB un total de 287 persoas (241 alumnado, 46 docentes e familias).

Convocouse unha primeira sesión de marco xeral, unha segunda con alumnado voluntario para afondar na súas vivencias a respecto da diversidade sexual, e unha última para o prototipado de accións que se poderían desenvolver no seu territorio para visibilizar este tema.

Con profesorado e familias, pola súa parte, desenvolvéronse seis obradoiros de dúas sesións cada un, onde sensibilizar e reflexionar sobre como acompañar as adolescencias nesta área. O Laboratorio traballou ademais coas áreas de igualdade dos seis concellos participantes, facendo unha primeira diagnose de accións que están levando a cabo en materia de diversidade sexual, e devolvendo posteriormente as propostas e necesidades do alumnado para a súa valoración.

Involucrou así mesmo a entidades LGBT+ como Avante LGBT+ Ferrolterra, o Colectivo Agrocuir da Ulloa, o Club de Lectura Queeruña, ou a Rede Educativa de Apoio LGBTIQ+, dando a coñecer o seu traballo entre os diferentes círculos participantes e promovendo a xeración de sinerxías. O LAB LGBT+ está financiado pola Deputación da Coruña, ao abeiro do programa de subvencións a entidades sen ánimo de lucro para o mantemento de políticas de xénero.

A cooperativa Rexenerando, equipo impulsor, seguirá traballando para continuar co programa na comarca no 2025. A Deputada de Igualdade, Soledad Agra, pechou este espazo de encontro onde a mocidade, as súas percepcións e ideas tiveron un papel central.

Lea también

Club Arco Narón inicia las clases al aire libre

Como viene siendo habitual, el mes de abril indica el comienzo de las clases de …