Xornada en Narón de conferencias e visitas guiadas ao CIMIX

A Mancomunidade de Concellos da Comarca de Ferrol, coa colaboración da Deputación da Coruña, organiza unha xornada dedicada ao Patrimonio Industrial de Ferrolterra, que se celebrará o vindeiro sábado 14 de decembro no Centro de Interpretación dos Muíños Industriais de Xuvia (CIMIX).

A xornada, aberta ao público en xeral, pretende poñer de relevo a riqueza do pasado e presente industrial da zona e concienciar sobre a importancia da conservación do seu patrimonio, como un atractivo singular. O programa dará comezo ás 9:45 horas, coa inauguración institucional desta convocatoria, e inclúe conferencias con recoñecidos expertos que abordarán diferentes aspectos do patrimonio industrial da comarca.

A primeira delas, ás 10:00 horas, correrá a cargo de Manuel Lara Coira, presidente da Asociación BUXA, que falará sobre a industria na contorna de Ferrol. A continuación, ás 10:30, María Begoña Bas López, destacada etnógrafa e profesora da Universidade da Coruña, falará sobre os muíños de Ferrolterra. Pola súa banda, ás 11:00 horas, Lorena Cuevas Buján, técnica en xestión do patrimonio, centrarase na construción naval na ría de Ferrol.

A xornada continuará despois dunha pausa, sobre as 12:00 horas, cun bloque dedicado a casos de boas prácticas na recuperación e posta en valor do patrimonio industrial. Concepción Fernández, directora de Museos, Patrimonio e Cultura da Fundación Ciudad de la Energía-CIUDEN de Ponferrada, compartirá a experiencia da transformación dunha antiga central térmica nun museo vivo e espazo cultural. Inés Gil Piñeirúa, axente de Desenvolvemento Local Oscos-Eo, presentará ás 12:45 o caso de Taramundi como referente no turismo rural.

Ao rematar esta conferencia, sobre as 13:30 horas, abrirase un debate moderado por Luis Alcalá, xerente da Mancomunidade de Concellos da Comarca de Ferrol.

Pola tarde, ás 16:30 o público poderá participar nunha excepcional visita guiada ao muíño das aceas de Xuvia e ás 17:30 ao recentemente inaugurado CIMIX, onde coñecerán de preto a historia e o funcionamento destes importantes elementos do patrimonio industrial de Narón.

Lea también

Club Arco Narón inicia las clases al aire libre

Como viene siendo habitual, el mes de abril indica el comienzo de las clases de …