Narón iza a bandeira galega na Casa da Cultura

O Concello de Narón  programou para este sábado coincidindo co 23 de novembro, festividade local, un izado da bandeira galega que se levará a cabo ás 12:00 horas na Casa da Cultura.

A iniciativa responde a unha proposta formulada pola Plataforma Social en Defensa dos Dereitos Nacionais de Galiza Vía Galega, conformada por 61 entidades e que aposta por impulsar iniciativas para propagar e popularizar os nosos símbolos nacionais, entre eles o himno e a bandeira.

O Consistorio sumouse á campaña de colocar e exhibir bandeiras, programada coincidindo coa semana na que se celebrou, durante o 17 e 18 de novembro de 1918 a I Asemblea Nacionalista das Irmandades da Fala, da que se cumpriron 106 anos.

Por este motivo, entre o 17 e o 23 de novembro deste ano animan a cubrir toda a xeografía galega de bandeiras galegas, engalanando tamén fiestras e varandas. O propio 23 haberá un acto en varias localidades galegas, entre elas Narón, para izar e colocar esas bandeiras nun lugar vistoso.

No acto participarán representantes da corporación local e procederase a ler un manifesto sobre a patria galega, a súa historia e as súa galeguidade.