Galicia Ártabra Digital Noticias de Ferrol y la comarca de Ferrolterra.
O programa municipal “A saúde mental importa” continúa desenvolvéndose este mes con tres novas conferencias. Así o anunciou a concelleira de Benestar Social, María Lorenzo, que avanzou que a primeira delas terá lugar este venres 8 ás 19.00 horas, no Centro Comunitario Manuela Pérez Sequeiros.
A psicóloga xeral sanitaria Yolanda Iglesias será a encargada de impartir a conferencia, falando de “A importancia do contexto na saúde mental”.
A seguinte cita deste mes será o día 16 ás 11.00 horas, no Centro Comunitario Manuela Pérez Sequeiros. “Mente e corpo traballan xuntos” é o título da ponencia desa xornada, que correrá a cargo de Virginia Penedo, psicóloga, profesora de ioga e meditación.
Neste día desenvolverase ademais un obradoiro dinámico de ioga e relaxación, con prazas limitadas, polo que é preciso inscribirse previamente enviando un Whatshapp ao número de teléfono 644 747 889.
“Unha mirada dende a saúde mental cara as claves do envellecemento” é o título da última conferencia programada para este mes. Será o día 23 ás 11.00 horas no Centro Comunitario Manuela Pérez Sequeiros, e a encargada de impartila será Rita Touza, psicóloga clínica no Hospital Psiquiátrico de Calde (Lugo).
A edil naronesa recordou que a entrada a todas estas conferencias é libre, ata completar a capacidade da sala, e recordou que é preciso inscribirse no obradoiro de ioga e relaxación, única proposta con prazas limitadas.
“Continuamos avanzando neste programa tan importante e que tan boa acollida ten entre a cidadanía, no que da man de profesionais no ámbito da saúde mental temos a oportunidade de coñecer máis polo miúdo un tema tan importante”.
