Galicia Ártabra Noticias de Ferrol y la comarca de Ferrolterra.
A Ludoteca municipal da Solaina retoma este mes a programación do novo curso co propósito de construír un futuro mellor para os nenos.
A edil de Bibliotecas de Narón, Olga Ameneiro, avanzou que na xornada deste venres 13 se celebrará no centro o Día Internacional do Chocolate cunha “tarde larpeira”. A iniciativa, na que participarán os menores matriculados no centro, consistirá nun obradoiro de cociña no que prepararán unha merenda que terá como ingrediente principal o chocolate, tal e como explicou a edil naronesa.
Esta festividade naceu como homenaxe ao escritor británico Roald Dahl, autor da recoñecida obra “Charlie e a fábrica de chocolate”. A concelleira recordou ademais que xa se poden realizar as inscricións para participar nas actividades e obradoiros que se desenvolverán na Ludoteca municipal este curso.
Os destinatarios son menores de 2 a 12 anos e terán preferencia os empadroados en Narón. As instalacións retomaron xa horario de tarde, e ofértanse un total de 20 prazas para cada un dos grupos establecidos (en función da idade e dos días e horarios): azul, verde, laranxa, vermello, mestura I e II e para o grupo branco (2 anos) un total de 15 prazas.
As familias interesadas en informarse poden facelo no horario de atención ao público das instalacións, de luns a venres entre as 19:00 e as 20:00 horas, no propio centro (rúa Cardenal Cisneros, 2, A Solaina) ou chamando ao número de teléfono 981 389 284.
