Torneo Internacional de volei Concello de San Sadurniño

O mellor volei regresa ao pavillón municipal de San Sadurniño durante toda a xornada deste sábado 14 coa disputa do tradicional torneo de volei patrocinado polo Concello, unha das citas ineludibles da pretemporada galega.

O equipo anfitrión e organizador, o Aldebarán Intasa, convidou nesta ocasión ao Club Vóley Palma e ao Arenal Emevé de Lugo, ambos de Superliga, ademais de volver traer ao Leixões Sport Clube, 4º clasificado no campionato ligueiro portugués na temporada 23/24 e vencedor na edición do ano pasado do trofeo municipal. 

A competición comezará ás 10:30 horas co emparellamento entre o Aldebarán-Intasa e o Palma. Posteriormente, ás 12:00 horas, está previsto que se xogue o segundo partido, que enfrontará ao Emevé Lugo co Leixões Sport Clube, equipo da primeira división portuguesa que xa participou -e ganou- no cadrangular o ano pasado.

O resultado de ambos partidos establecerá os nomes que xogarán a partir das 17:30 horas pola terceira e cuarta posición e hora e media despois, ás 19:30, tocaralle aos ganadores da mañá decidir quen levará para a súa vitrina o trofeo municipal.

A competición será para o equipo local -e tamén para os outros- un ensaio de cara á temporada que comezará o próximo 5 de outubro. O Aldebarán-Intasa xogará ese día na cancha do Galdakao, equipo biscaíño que se estrea este ano na categoría. Pola súa banda, para o Emevé e para o Palma, o torneo de San Sadurniño podería ser un anticipo do que veremos no encontro que enfrontará a ambos equipos na xornada inaugural da Superliga masculina.

Os azuis están desvelando desde hai uns días nas redes sociais a composición do primeiro equipo masculino, no que polo momento se confirma a continuidade do adestrador, Pablo Gómez Parga, e da maior parte dos nomes que fixeron posible o ascenso a Superliga.

No Facebook do club xa se anunciou  que seguirán Roi Losada, Marcos Blanco, Antonio Tacón, Manuel Gomes, Luis Meza, Manuel Aba, Álex Vizoso, Jaime Caamaño, Lucas Wünchmann e o histórico Marcos Piñón «Pakito».

Ademais tamén volve á casa o adestrador Charly Suárez como responsable do equipo infantil masculino e da coordinación de toda a base, dentro da estratexia do Aldebarán de reforzar o seu proxecto garantindo relevos desde abaixo.

Neste sentido xa se publicaron os horarios das escolas, que durante todo este mes ofrecen a oportunidade de probar de balde a disciplina.  Para entrar formar parte delas hai que cubrir este formulario en liña. Pode ampliarse información no teléfono  697 392 693 ou no correo aldebaranvoleibol@gmail.com.