O concello de Ferrol conmemorou o Día de Galicia coa tradicional ofrenda floral

O alcalde de Ferrol, José Manuel Rey Varela, presidiu na mañá deste luns, día 22,  o acto institucional conmemorativo do Día de Galicia na Praza do Himno Galego, en Esteiro, ante o monumento a Xosé Fontenla Leal, onde se realizou a tradicional ofrenda floral. Ao acto asistiron o primeiro tenente alcalde, Javier Díaz; voceiros  do grupo municipal  do PP. María del Carmen Pieltain; de FeC, Jorge Suarez; do BNG, Ivan Rivas; o  concelleiro de Cultura, José Ponte Far; e outros membros da corporación municipal; o presidente da Autoridade Portuaria, Francisco Barea; o bispo de Mondoñedo-Ferrol, Fernando García Cadiñanos; a vicerreitora do Campus Ferrol, Ana Ares Pernas; e representantes de diferentes entidades da cidade. Tamén acudiron membros do grupo de danzas e da masa coral do Real Coro «Toxos e froles» que que puxeron baile e música ao acto.

As nosas raices, as nosas tradicións e todo aquilo que nos une como galegos

Tomou a palabra Rey Varela  quen sinalo que «A celebración do Día de Galicia é a mellor ocasión para reunirnos  nesta praza do Himno Galego por varios e fundamentais motivos,  como o son lembrar as nosas raices, as nosas tradicións e todo aquilo que nos une como galegos.

E facémolo  en torno ao monumento que preside este espazo público e que está adicado  a Xosé Fontenla Leal». 

 O rexedor lembrou a figura de Fontenla Leal, persoeiro clave na creación da Real Academia Galega e divulgador incansable da cultura galega desde Cuba, país ao que emigrou xunto a seus pais.

«Tamén  desde Cuba tivo unha importante participación na difusión do himno galego, ao que puxeron música e letra  Pascual Veiga  e Eduardo Pondal, outros dous destacados persoeiros galegos cuxos nomes identifican sendas rúas  que abrazan esta praza.

Este ilustre ferrolán forma parte  dunha longa lista de nomes que levaron a nosa cultura  aló onde foron»

Nas súas verbas tamén lembrou a outro ilustre ferrolán, Gonzalo Torrente Ballester, a quen o Concello está a dedicar este ano 2024 no 25 aniversario do seu pasamento.

Torrente pasou gran parte do tempo da súa infancia  na casa dos avós maternos, en Serantes.

O contraste entre esa fantasía desenvolta  na casa de Os Corrais e a lóxica dunha cidade moi racionalista e unha  das principais características  do seu legado.

Os ferroláns sentímonos orgullosos de que a nosa terra fose fonte de inspiración para a súa obra, de incalculable valor na cultura  e na sociedade actual»

Ricardo Carvalho Calero foi outro dos persoeiros que mencionou o alcalde durante as súas palabras, coas que enxalzou os elementos diferenzadores da terra galega, como a lingua, a música, a arte ou o folclores, así como aqueles singulares da cidade departamental, como o Real Coro Toxos e Froles.

«Por iso cumpre poñer en valor ás persoas que sentaron  as bases da nosa cultura, pero tamén é igual de necesario traballar no presente  cunha  ollada dirixida ao futuro para seguir mantendo vivo o que nos identifica como galegos».

«A lingua, a música, a arte, o folclore, a gastronomía, e todo aquilo polo que cada vez máis a nosa terra é admirada non só por nós mesmos senón tamén por aqueles que non gozan da mesma sorte ca nós vivindo nesta terra«.

Lembrou tamén a «un dos máximos expoñentes das tradicións ferrolás, a Festa das Pepitas, que aspira a elevrar o seu recoñecemento de interés turístico rexional a nacional»

O galeguismo integrador

O alcalde da cidade tamén reivindicou o galeguismo integrador “como fío condutor da defensa da nosa cultura e da nosa lingua ambos , elemento clave  da nosa identidade como pobo», asegurando que “desde Ferrol defendemos unha Galicia plural na que todos cabemos, coa que todos nos sentimos identificados e na que non debe haber espazo para a confrontación. E isto materializase hoxe  no ofrenda floral que todos os presentes faremos”. «Porque o futuro de Ferrol será mellor coa unión de esforzos políticos, asociativos e da cidadanía...» e rematando a súa intervención desexando un feliz día de Galicia a todos os presentes.

Por parte do alcalde, voceiros dos grupos do concello e asistentes realizouse unha ofrenda floral ante o monumento a Fontenla Leal, representando a Bandeira Galega, rematando co «Himno galego».