Ferrol acolle un encontro do proxecto europeo Waste2BioComp

Os días 2 e 3 de xullo, o Campus Industrial de Ferrol da Universidade da Coruña acollerá un encontro do proxecto europeo Waste2BioComp, que ten como obxectivo transformar residuos orgánicos en materias primas para a fabricación sostible de novos produtos.

O proxecto está enmarcado no programa Horizonte Europa e conta cun orzamento de máis de 5,8 M€. Nel participan 13 organizacións de seis países que colaboran conxuntamente na súa execución. Na UDC, é a investigadora experta en biopolímeros Belén Montero Rodríguez quen lidera o equipo que actualmente traballa na preparación de compoñentes biolóxicos para desenvolver envases, téxtiles, escumas e outros materiais.

O Grupo de Polímeros do CITENI exerce como organizador e anfitrión do encontro.

A axenda das xornadas inclúe paneis de discusión e presentacións sobre a evolución do proxecto e a aplicación dos biopoliésteres na industria. O martes 2 de xullo (de 9:00 a 20:00 horas) realizarase a reunión do consorcio, que abranguerá as seguintes actividades:

-Benvida e análise do estado do proxecto
-Presentacións sobre os traballos en curso e os xa realizados polas entidades socias do consorcio.
-Discusión xeral e planificación futura
-Visita ás instalacións da UDC en Ferrol
-Cea de tecedura de redes (networking)

Durante a mañá do mércores 3 de xullo (de 9:00 a 13:00 horas) terá lugar o evento intermedio de Waste2BioComp, un encontro aberto ao público que incluirá sesións con persoal experto da industria sobre o estado da arte en materia de biopoliésteres.

O programa inclúe estes contidos:
-Seminario sobre biopoliésteres en Waste2BioComp
-Sesión sobre biopoliésteres na industria
-Mesas redondas e quenda de preguntas

As persoas asistentes poderán coñecer de primeira man os desenvolvementos en biomateriais aplicables a industrias como a do calzado, o plástico e o téxtil.  Espérase a participación de estudantado, persoal investigador e profesionais da industria, co obxectivo de promover o intercambio de coñecementos e fomentar a colaboración no tocante á economía circular e á química verde. O evento terá lugar no Salón de Graos da Facultade de Humanidades e Documentación do Campus Industrial de Ferrol.

A asistencia a este acto será libre, con inscrición previa.  As persoas interesadas poden informarse no sitio web do proxecto (https://waste2biocomp.eu/) e formalizar a inscrición a través do seguinte formulario:

https://docs.google.com/forms/d/e/1FAIpQLSfpw5Ig_RPK2TFLZ1SCOwgQcTlppzIl8Qs6bhJYAcaRK99xA/viewform.