Narón reactiva a campaña sobre o programa de reciclaxe de residuos orgánicos

A campaña informativa “Ti tes a chave” sobre o programa de reciclaxe de residuos orgánicos en Narón continuará desenvolvéndose esta semana na cidade con novas accións a pé de rúa. Así o anunciou o edil de Servizos, Manuel Ramos, que avanzou que as sesións se desenvolverán durante catro venres, nos meses de xuño e xullo, en horario de mañá e tarde.

Este venres 21, a carpa informativa, atendida por profesionais nesta área, instalarase pola mañá nas inmediacións do novo centro de saúde, en horario de 10:30 a 13:30 e pola tarde no parque do río Freixeiro, entre as 15:30 e as 18:30.

A campaña continuará o vindeiro venres, día 28, xornada na que a cidadanía poderá informarse xunto á entrada principal do Consistorio, de 10:30 a 13:30 e pola tarde, entre as 15:30 e as 18:30 nas inmediacións da Praza da Constitución, na Solaina.

No mes de xullo, a campaña informativa sobre o programa de reciclaxe de residuos urbanos retomarase o día 5, permanecendo a carpa en horario de mañá nas inmediacións do Centro Comercial Odeón e pola tarde na Praza da Gándara.

A última das xornadas programadas nesta quenda será o día 12 do citado mes, instalándose de novo a carpa xunto ao novo centro de saúde pola mañá e no paseo marítimo de Xuvia (xunto á zona de xogos) pola tarde.

No colector marrón deben depositarse restos de carne e peixe, cunhas de marisco ou froitos secos, de pan, café, tapóns de cortiza, restos de verduras e froitas…en definitiva, calquera resto orgánico.

As persoas que acudan ao posto informativo interesadas en participar na campaña recibirán o kit de benvida, que consiste nun colector marrón de dez litros para uso doméstico, un lote de bolsas de compostaxe para os primeiros usos e a chave do colector marrón.

O edil naronés recordou que estas campañas se iniciaron xa o pasado ano, antes da entrada en servizo dos novos colectores marróns, algo máis de medio cento, xa instalados na zona urbana da cidade.

Localízanse naqueles núcleos nos que o radio de distancia alcanza un considerable número de vivendas e tamén de áreas comerciais e de hostalería. Ramos destacou que a día de hoxe “hai dadas de alta nesta campaña un total de 550 persoas, unha cifra moi significativa e que irá incrementándose co paso do tempo, contribuíndo a incrementar a reciclaxe de residuos orgánicos”.

O edil destacou o feito de que “queremos ser máis sostibles e iso so será posible coa implicación de toda a cidadanía, por iso queremos facer unha nova chamada á participación das familias de Narón neste novidoso proxecto, que de seguro sentará as bases do que será a futura recollida de lixo da nosa cidade”.

Lea también

La navarra EMPER adquiere dos importantes empresas con instalaciones en Narón

Según informa “Navarra Capital” la empresa EPER Metallic Solutions, fabricante navarro de estructuras metálicas con …