AECC celebra en Ferrol un talk show para a prevención na adolescencia

A Asociación Española Contra o Cancro no marco do  proxecto de prevención da enfermidade dirixido a mozos da provincia de  Coruña, “O challenge da túa vida”, celebra o seu terceiro e último evento presencial,  en formato talk show, no IES Concepción Arenal de Ferrol, o 25 de xaneiro, nel o alumnado de 3º da ESO coñecerá máis sobre a importancia da sexualidade segura e da protección solar.  

A campaña arrincou o pasado 30 de novembro no IES Eusebio da Guarda da Coruña,  o segundo evento tivo lugar o 18 de decembro no IES Rosalía de Castro de Santiago  de Compostela e rematará mañá, xoves 25 de xaneiro en Ferrol, e quere facer chegar  e informar aos adolescentes sobre temas que lles afectan directamente: os riscos do  consumo de alcol e tabaco, a importancia do exercicio e alimentación saudable, a  sexualidade segura e a protección solar.  

O condutor do evento será Arturo Fernández, periodista e presentador en CRTVG,  que compartirá escenario co Profesor José Tubío, médico investigador  especializado en cancro e Director do grupo ‘Genomas y Enfermedad’ do Centro de  Investigación en Medicina Molecular e Enfermidades Crónicas (CiMUS) da  Universidade de Santiago de Compostela, acompañados da bióloga e influencer de  estilo de vida e sustentabilidade BlondieMuser.