Programa municipal “N de Narón, a festa das Letras”

A alcaldesa da cidade, Marián Ferreiro, presentou este mércores, día 27 de abril, xunto coas edís de Ensino, Mercedes Taibo, e Festas, Natalia Hermida, unha nova edición do programa municipal “N de Narón, a festa das Letras”

A rexedora local destacou a programación que se desenvolverá un ano máis para conmemorar o vindeiro 17 de maio o Día das Letras Galegas, adicado este ano a Florencio Delgado Gurriarán con propostas ó longo de toda a xornada para público familiar, de balde, na praza da Lectura, nas Vivendas da Mariña (Santa Icía)

A maiores dos espectáculos e do obradoiro programados, haberá na zona un espazo de lectura con publicacións en galego de autores e autoras homenaxeados no Día das Letras Galegas e outro de venda das librarías locais Day e Pasapáxina

A primeira cita será ás 12, cun espectáculo de contos e canción, “Diferentes diferenzas”, a cargo de Silvia Penide. O primeiro libro de Penide é un canto á diversidade, no que se transmite a importancia de valorar, respetar e admirar ás persoas, animais, cousas… e ofrece tamén a posibilidade de que os  nenos aprendan palabras básicas en lingua de signos.

A continuación, ás 12.45 será o turno de Xarope Tulú, que trae a Narón nesta ocasión unha proposta de teatro interactivo, “Rilla, Rilla”. Un espectáculo creado para aprender galego, moi dinámico para que o público interactúe e donde as crianzas e as familias serán os protagonistas.

As actividades do Día das Letras Galegas continuarán pola tarde, ás 16.00, cun obradoiro de pintura sobre cartón reciclado, denominado “Obradoiro das Efémeras”. Está aberto á participación das crianzas que se acheguen, que poderán confeccionar as súas propias ás con pintura e cartón reciclado, entre outros materiais.

A música e os contacontos protagonizan a segunda proposta da tarde, a partir das 17.00 horas, con Jara Ortiz, baixo o título “Lúa triangular”. Unha rapaza chamada Marta e unha píntega, de nome Oli, viaxan xuntas ó Mundo dos Contos, donde viven varias aventuras e transformarán o mundo nun lugar cheo de diversidade e xustiza, coñecendo a protagonistas de contos populares como Branca de Neve ou Carapuchina Vermella.

Ás 17.45 horas dará comezo o espectáculo “A ovella Engracia”, con narración oral e música de Aldaolado. Á ovella gustaríalle saber a onde vai a lúa cando sae de noite e por iso decide escapar unha noite e andar tras dela. Nesa viaxe, Engracia aprenderá a confiar en si mesma, a vencer os seus temores e a non perder a curiosidade, converténdose ademais na primeira ovella contadora de historias do mundo.

A programación do Día das Letras Galegas rematará co concerto de As Efémeras, que dará comezo ás 18.45 horas.

Dende o Concello animaron ós veciños a sumarse ás diferentes propostas coas que se conmemorará esta festividade, con propostas lúdicas e ó mesmo tempo didácticas que porán en valor a nosa lingua e a cultura en xeral