Galicia Ártabra Digital Noticias de Ferrol y la comarca de Ferrolterra.
As entradas para os dous concertos que se celebrarán na segunda edición de “Noites á fresca” poderán retirarse, de balde, a partir de mañá xoves na web: www.ataquilla.com
O venres día 16 de xullo actuarán Budiño&Novoa a partir das 22.00 horas e o sábado día 17 A Banda da Loba, nese mesmo horario e en ambos casos xunto á centenaria magnolia de Xuvia. A través deste evento apóstase por impulsar as actividades culturais, neste caso os concertos, en espazos de interese turístico e patrimonial da cidade.
Budiño&Novoa interpretarán algúns dos seus éxitos musicais e tamén temas novos creados para este espectáculo e outros versionados. No caso da Banda da Loba tamén cantarán temas propios e musicalizacións de poetas célebres e textos de poemarios de escritoras contemporáneas, ó tempo que presentarán na cidade “Fábrica de luz”, o seu novo traballo.
A música dos profesionais que participan nesta segunda edición de “Noites á fresca” combinarase cunha posta en escena moi coidada, na que a iluminación do espazo cobrará un papel fundamental.
En total poderanse reservar 120 entradas para cada un dos concertos programados neste evento.
