O alcalde mostra a súa satisfacción pola aposta do Goberno polo ferrocarril de vía estreita e di que seguirá traballando para lograr a conexión co Eixo Atlántico

O alcalde, Ángel Mato, mostrou esta mañá a súa satisfacción e a do seu equipo de goberno “pola aposta polo ferrocarril de vía estreita que acaba de facer o Goberno” ao destinar máis de 14 millóns de euros a ese fin. O rexedor dixo que a substitución do bloqueo telefónico por outro automático, que onte aprobou o Consello de Ministros, é “a inversión máis importante en décadas” na liña entre Ferrol e Ortigueira. Segundo afirmou, esta obra non supón só un significativo aumento da seguridade no tramo, senón que tamén “vai favorecer un incremento do número de frecuencias e melloras nos horarios”.

“Tiven a ocasión de reclamar a distintos Gobernos medidas para impulsar as conexións ferroviarias”, lembrou Mato en referencia á súa etapa como senador, durante a que xa no 2016 firmou unha moción na que lle esixía ao Executivo a supresión do bloqueo telefónico, “desaparecido na maior parte da rede do ADIF, xa que na maioría existe o bloqueo automático”, dicía o escrito. Por iso, considera “unha boa noticia que o Ministerio de Fomento atendera esta reclamación que Ferrol vén facendo dende hai anos”, e que vai na liña na de acadar unhas comunicacións modernas, algo que, insiste, seguirá a reclamar “sen descanso”.

Incorporación do novo parque rodante

O alcalde considerou que esta medida -“que vai na liña de que todos os cidadáns, calquera que sexa o seu lugar de residencia, teñan acceso aos servizos”- completarase coa incorporación do novo parque rodante que xa licitou o Goberno. Pero tamén debe vir acompañada de melloras nos apeadeiros, porque en Ferrol esta liña é un tren de cercanías, e porque isto “forma parte das ordes de servizo público que ten previstas o ministerio”.

Acadado este paso para modernización do ferrocarril, Ángel Mato invitou á Xunta e avanzar na construción da vía de alta capacidade do norte moito máis do previsto. Dixo que debe “tomar nota” e apostar tamén por esa estrada cun incremento da partida recollida no proxecto de Orzamentos para o 2020 e así unir canto antes mediante unha VAC o norte da provincia da Coruña coa Mariña lucense, “co que isto suporía para a competitividade das empresas de toda a zona”.

Do mesmo xeito, o rexedor comprometeuse unha vez máis a continuar traballando na reparación do “desequilibrio histórico” que supón para Ferrol seguir á marxe do Eixo Atlántico ferroviario. Insistiu en que pese a que este proxecto data de hai arredor de dúas décadas, á cidade “segue chegando un ferrocarril practicamente do século XIX”. Reparar esa situación, dixo, “é unha cuestión de xustiza”.