Galicia Ártabra Digital Noticias de Ferrol y la comarca de Ferrolterra.
O pleno municipal de hoxe aprobou, entre outros puntos, a conta xeral do Concello correspondente ao exercicio do 2018 e a prórroga do contrato de servizo de axuda no fogar “polo tempo necesario para a preparación e adxudicación do novo contrato, e como máximo dun ano”.
Os primeiros puntos da orde do día foron a aprobación da acta da sesión anterior e dar conta das resolución ditadas pola alcaldía no período comprendido entre o 15 de agosto e o 13 de setembro.
A proposta de designación dos representantes do Concello na Comisión de Desaugamento da Zona Hidrográfica Galicia Norte (punto 3) foi aprobada por unanimidade.
O punto 4, un expediente de omisión de fiscalización previa de facturas de Urbaser, aprobouse cos votos a favor dos grupos do PSOE e Ferrol en Común (11) e a abstención de PP e BNG (14).
O punto 5, un expediente no mesmo sentido referido á UTE San José-El Ejidillo, aprobouse con igual reparto de voto
O punto 6, a proposta de aprobación da conta xeral do exercicio 2018, aprobouse cos votos a favor de PSOE e Ferrol en Común (11), a abstención do PP (12) e en contra do BNG (2).
O punto 7, un suplemento de crédito polo “incremento de cotizacións á Seguridade Social”, segundo explicou a concelleira de Facenda, aprobouse por unanimidade.
O punto 8, proposta de nomeamento de representantes municipais nos consellos escolares, aprobouse con 23 votos a favor e 2 abstencións (BNG).
O punto 9, a proposta de aprobación da continuidade do contrato do servizo de axuda no fogar, aprobouse cos votos a favor de PSOE, FeC e BNG e a abstención do PP.
O punto 10, dar conta das víctimas mortais por violencia de xénero dende o 1 de xaneiro ata o 18 de setembro.
O punto 11, dar conta da aprobación da declaración institucional en apoio á campaña Emerxencia Feminista, , votouse igualmente e houbo unanimidade.
O punto 12, a toma de coñecemento da sucesión da empresa People Plus Innovatio an todos os dereitos e obrigas da sociedade Optima Facility Services en relación aos contratos do servizo de axuda no fogar, obtivo 11 votos a favor (PSOE e Fec) e 14 abstencións.
O punto 13, unha moción dos grupos de FeC e BNG sobre a declaración da emerxencia climática no Concello de Ferrol, foi aprobada cos votos favorables de PSOE FeC e BNG, mentres que o PP se abstivo.
A continuación votouse o punto 16, unha moción do grupo do BNG relativa á situación laboral en Navantia. A votación dividiuse en dous bloques: por unha banda, os puntos 1, 2 e 3 da moción, para os que houbo unanimidade, e por outra o punto 4, que votaron en contra PSOE e Fec (11), mentres que o PP se abstivo (12) e o BNG votou a favor (2), co que foi rexeitada.
Seguiu o punto 18 da orde do día, unha moción do grupo de FeC en apoio dos doentes de párkinson nas súas demandas de mellora do servizo galego do 065. Houbo unanimidade a favor na votación.
Despois votouse, en dous bloques, o punto 14, unha moción do grupo do PP relativa á adopción de medidas de apoio á actividade comercial en Ferrol, á que o PSOE presentou varias emendas que o PP non aceptou. Os puntos 1 e 2 obtiveron os votos a favor do grupo do PP (12) e en contra dos grupos do PSOE, FeC e BNG (12 por ausencia temporal do alcalde). Desfixo o empate o presidente, o primeiro tenente de alcalde, co seu voto de calidade. Os puntos 3 e 4 lograron o apoio de PSOE, PP e FeC, mentres que o BNG votou en contra.
O punto 15 incluía unha moción do PP relativa ao apoio aos traballadores vinculados á central térmica das Pontes. O PP aceptou incorporar ao documento tres emendas do PSOE. Tamén se votou por puntos. O 1, o 2, o 3 e o 4 aprobáronse con 23 votos a favor e os dous en contra do BNG. Os outros cinco saíron adiante por unanimidade.
Finalmente, no punto 17, unha moción de FeC que instaba á continuación do procedemento de adxudicación de locais en Porta Nova, votaron a favor FeC e BNG (5), en contra o PSOE (8) e o PP abstívose (12).
