O goberno de Ferrol abre un prazo de achegas a cidadanía para a redacción da nova ordenanza de accesibilidade

O Concello de Ferrol ten a vontade de aprobar unha ordenanza referida á accesibilidade e supresión de barreiras arquitectónicas.

Unha sociedade cada vez máis participativa e sensibilizada coa problemática da accesibilidade, demanda unha maior implicación das distintas administracións na protección dos dereitos das persoas relacionados coa mellora da accesibilidade e supresión de barreiras arquitectónicas, expón a concelleira de Urbanismo e Mobilidade, María Fernández Lemos.

Ao respecto da accesibilidade, existe unha amplísima regulación estatal e autonómica ao respecto que vai detallada polo miúdo no documento de traballo adxunto. A última, a Lei de Accesibilidade de Galicia (10/2014), aprobada o 3 de decembro e fundamentada nos principios de accesibilidade universal, deseño para tódalas persoas, inclusión social, igualdade de oportunidade, vida independente, diálogo civil e transversalidade das políticas en materia de discapacidade. A anterior ordenanza de accesibilidade municipal data de setembro de 1993, mentres que o PXOM foi aprobado no ano 2001.

“É moi necesario articular e aprobar dunha nova ordenanza de mellora integral da accesibilidade e supresión de barreiras arquitectónicas para o noso municipio, adecuada á normativa vixente e axustada as nosas particularidades. Un texto integrador que regule, unifique a normativa, coordine e estableza os criterios de aplicación, execución e control, de acordo cos criterios de proporcionalidade e axustes razoables, no marco das condicións establecidas pola lexislación básica, estatal e as directrices internacionais”, subliñaba hoxe a concelleira.

«E neste proceso, -manifestaba Fernández Lemos- agardamos poder contar, como viñemos facendo ate agora, coa implicación, a colaboración e as achegas das asociacións que sempre nos dan unha visión moito mais apegada a súa realidade para unha regulamentación eficiente”.

A vontade do Goberno local de avanzar nesta dirección ponse de manifesto nos proxectos executado ou en marcha que afondan e abundan na mellora da accesibilidade nos cruces de peóns (actualmente na IV fase) e na mellora dos accesos a centros deportivos i escolares que se acometerá este verán. Proxectos nos que se contou coa participación activa e as achegas feitas desde ASCM e Diversidade Funcional, que permitiron un mellor deseño dos mesmos atendendo a súas demandas.

PERIODO DE CONSULTA PÚBLICA PREVIA A REDACCIÓN DA ORDENANZA

Co obxecto de contar cunha nova ordenanza municipal, axeitada a realidade municipal, equilibrada, participada e axustada a estes principios de igualdade de oportunidades, -de conformidade co previsto no artigo 133 da Lei 39/2015, do 1 de outubro, do procedemento administrativo común das Administracións Públicas-, o Concello de Ferrol abre un período de consulta pública previa de 20 días hábiles ao documento de traballo elaborado pola área de Urbanismo e Mobilidade para a redacción dunha ordenanza de accesibilidade e supresión das barreiras arquitectónicas.

Os cidadáns, organizacións e as asociacións debidamente acreditadas poderán presentar as súas opinións e suxestións a fin de implementar e redondear a redacción da mesma.

A redacción establecerá as condicións precisas para conseguir unha sociedade inclusiva e accesible que garanta a autonomía das persoas, evite a discriminación e favoreza a igualdade de oportunidades para toda a cidadanía, especialmente para as persoas con diversidade.

Así mesmo, preténdese que o deseño e materialización da accesibilidade universal, nos procesos, proxectos, produtos e servizos, aporte plena seguridade no uso do medio físico e evite gastos posteriores de eliminación de barreiras. Esta normativa aplicarase nos deseños dos proxectos de urbanización e elementos do mobiliario urbano, así coma os elementos arquitectónicos compoñentes da edificación con independencia da súa titularidade, pública ou privada, ca fin de eliminar e evitar o uso de barreiras no concello.

O documento pódese consultar desde hoxe na seguinte ligazón, http://www.ferrol.gal/Sede/ConsultasPreviasAmpliar/2 e o prazo de 20 días para realizar as achegas comeza a contar desde o martes 3 de xullo ate o 31 de xullo.

¿Como facer achegas? Os cidadáns, organizacións e as asociacións rexistradas e interesadas en expor as súas consideracións poden facer facernos chegar as súas opinións e suxestións por estas canles no prazo de 20 días hábiles desde a data de publicación na web municipal por estas tres vías:

Escrito no Rexistro Central ou no de Urbanismo (rúa María, 52) dirixido ao Servizo de Urbanismo e Infraestructuras a través dun destes canles de participación:

a) Correo electrónico: planeamentoxestion@ferrol.es

b) No rexistro telemático do “Portal do cidadán” da Sede Electrónica da web do Concello de Ferrol (www.ferrol.gal), require certificado dixital ou DNI electrónico