Galicia Ártabra Digital Noticias de Ferrol y la comarca de Ferrolterra.
O BNG apresentou un escrito dirixido á Valedora do Pobo, no que denuncia diversas irregularidades no proceso de tramitación do PXOM de Ares, que vai desde marzo do 2014 até agora. Esta medida foi tomada debido a que, segundo o portavoz municipal do BNG no concello de Ares, Emilio Mesías “todas as iniciativas que quixemos implementar na corporación para garantir a transparencia e a seguridade xurídica das persoas afectadas e tamén do conxunto da veciñanza- foron torpedeadas desde o goberno municipal”.
Mesías fai alusión á “indefensión na que se atopan as máis de 600 persoas que tiñan presentado alegación á aprobación inicial do PXOM, o 6 de marzo de 2014, e que a día de hoxe non recibiron contestación” nun proceso que cualificou de “opaco e de dubidosa legalidade” facendo mención tamén a que “os grupos da corporación pol menos, o BNG- foron apartados do proceso de tramitación do PXOM, que está a facer o goberno municipal en solitario”.
Cualificou de “verdadeiro escándalo” o feito de que se creara no seu momento unha “delegación especial para a tramitación do PXOM para o concelleiro de NAL, Luis Cendán que, pese a estar moi ben retribuida económicamente, semella que non ten efectos práticos”.
O portavoz nacionalista fai referencia tamén á negativa a facilitar documentación e información a algunhas persoas afectadas que así o tiñan solicitado “infrinxindo claramenteo artigo 87 da vixente Lei 2/2016, do 10 de febreiro, do Solo de Galicia”. E acusa directamente ao alcalde de mentirlle á cidadanía, xa que “hai pouco tempo fixo unhas declaracións aos medios dicindo que todos os informes preceptivos dos diversos organismos para a tramitación do PXOM eran favorábeis cando, segundo a documentación que lles foi entregada aos grupos “dos 15 informes emitidos, só figuran favorábeis tres; e o resto están condicionados a modificacións ou emitíronse en sentido negativo”.
Finalmente, o BNG fai mención ao incumprimento flagrante dos acordos plenarios; lembrando que en xuño deste ano -a instancia do BNG- aprobouse unha moción por unanimidade na que, entre outras cousas, acordábase que se dera resposta ás alegacións presentadas hai tres anos e medio; e sen embargo “non só non se deu cumprimentoao acordo, senón que no último pleno da corporación o alcalde desdíxose para afirmar que non se dará resposta ás alegacións presentadas”.
Desde o BNG faise mención tamén ao papel da Xunta en todo este proceso, xa que “hai perto de cinco meses que o BNG fixo unha pregunta no Parlamento Galego para aclarar o que está a acontecer, e a día de hoxe non tivemos contestación algunha”, o que Emilio Mesías cualifica de “evidente complicidade, mesmo que sexa por omisión, no incumprimento da propia Lei do Solo de Galiza”.
