A alcaldesa de Narón recibiu a unha técnica municipal de Mozambique que se formará nos vindeiros días no concello

A alcaldesa de Narón, Marián Ferreiro, e a concelleira de Acción Social, Catalina García, recibiron na mañá deste xoves no Concello a Ailina da Marta Feniosse, unha topógrafa de 24 anos procedente do municipio de Vila de Mandlakazi, en Mozambique. A rapaza participa no programa “Vacacións con traballo en Galicia 2017”, impulsado polo Fondo Galego de Cooperación e Solidariedade. En virtude ao mesmo, Ailina da Marta intercambiará ata o vindeiro luns, día 30, experiencias con outros profesionais sobre as áreas de medio ambiente, saneamento, planificación urbanística e estradas. Ferreiro deu a benvida a Narón á técnica mozambiqueña, á que desexou unha agradable estadía no municipio tras ensinarlle algunhas dependencias municipais e tamén ofrecerlle a colaboración precisa desde a administración local para ampliar a súa formación nas áreas citadas anteriormente.

A topógrafa mozambiqueña realizou unha presentación no Concello sobre o traballo que realiza no seu municipio de orixe. Ademáis da alcaldesa e a edil de Acción Social presenciou a cita o arquitecto municipal, Manuel Otero, que xunto con persoal do departamento municipal de Urbanismo e doutras áreas acompañará a Ailina da Marta a visitas programadas nos vindeiros días ao polígono de Río do Pozo, aos tanques de tormentas construídos polas obras do saneamento e a outras infraestruturas e instalacións. “Agardo que coa miña estadía no programa Vacacións con Traballo en Galicia poida recoller experiencias doutros concellos nos eidos mencionados e achegar a maior contribución á vila de Mandlakazi grazas aos coñecementos adquiridos”, asegurou.

Catalina García destacou “a forza e a valentía dunha muller que aos 24 anos é topógrafa e que fai un traballo que hai anos se reservaba exclusivamente aos homes pero que hoxe en día afortunadamente levan a cabo moitas mulleres, contribuíndo como no caso de Ailina a mellorar o seu país de orixe”.

Finalmente Ferreiro destacou tamén a labor da profesional mozambiqueña e subliñou a importancia desta iniciativa do Fondo Galego de Cooperación e Solidariedade en canto “permitirá reforzar a capacidade dos municipios de países con menos recursos, diminuíndo as desigualdades que moitas veces se rexistran entre os mesmos”. “Trátase dun paso que resulta fundamental para que desde os concellos dos países con menos recursos poidan avanzar en beneficio das súas veciñas e veciños, algo posible tamén grazas á implicación de persoas como Ailina que nos acompañará estes días no municipio de Narón para adquirir novas experiencias e compartir as súas propias en materias como saneamento ou urbanismo, entre outras”.

O Fondo Galego de Cooperación e Solidariedade, que cumprirá este ano o seu vixésimo aniversario, está formado por un total de noventa concellos, entre eles o de Narón, e as Deputacións da Coruña, Pontevedra e Lugo.

Lea también

Narón abre inscrición nunha andaina con motivo da Romaría da Virxe da “O”

O Concello de Narón organiza a través do Padroado de Deportes e da Concellería de …