A Deputación rematará en xuño as obras de ampliación da Estrada do Trece, en Narón, nas que inviste 1,2 millóns de euros

 O presidente provincial, Valentín Gonzalez Formoso, visitou na mañá deste mercores algunhas das obras e proxectos nos que colaboran a Deputación e o concello de Narón, e abordou coa alcaldesa, Marián Ferreiro,  varios dos proxectos nos que tamén participará a institución provincial.

Entre estas cuestións, tratáronse as reformas demandadas polos veciños nas beirarrúas da ponte sobre as vías ferroviarias en Santa Icía. “Trátase dunha cuestión que nos preocupa a todos e queremos darlle solución no menor prazo posible”, afirmou González Formoso, pero lembrou que “á complexidade técnica do proxecto súmase tamén a complexidade administrativa, porque precisamos permisos do xestor ferroviario, xa que a ponte entra no se ámbito de afección”.

O presidente provincial manifestou a intención do servizo de Vías e Obras de “solucionar este problema da forma máis áxil posible” e pediu a “colaboración do concello para a realización das xestións”. Así mesmo, afirmou que “a Deputación investirá o que faga falta, non vai ser un tema condicionado polos recursos económicos” para solventar este problema de seguridade.

Utilidade do Plán Único

Asemade, Marián Ferreiro destacou a “utilidade do novo Plan Único” e agradeceu que se variase o antigo POS para permitir aos concellos ter máis capacidade de decisión no investimento dos fondos provinciais. No bienio 2017-2018, o concello de Narón recibe un total de 4.040.598,34 euros, a maior de toda a comarca ferrolá e unha das achegas máis elevadas en toda a provincia.

González Formoso e Ferreiro tamén abordaron a posible transferencia ao concello da estrada do Feal, a DP-5407, así coma as diferentes actuacións que sería necesario acometer nesta vía, para as que os técnicos provinciais xa están a realizar un proxecto.

Máis de 1 millón de euros para ampliar a estrada do Trece

Valentín González Formoso, acompañado da alcaldesa de Narón, Marián Ferreiro,  visitou tamén as obras que xa se están executando na DP-5404, de Xubia á praia da Frouxeira, para ampliar a estrada e reducir a sinuosidade do trazado.

O presidente provincial confirmou que os traballos neste vial, coñecido coma a estrada do Trece, “está previsto que rematen en xuño do 2018” e destacou que esta acción suporá “unha mellora substancial na seguridade viaria”, así coma unha maior fluidez na circulación.

A Deputación inviste 829.939 euros neste proxecto, dos cales 452.143 € destinaranse ás melloras na calzada e outros 377.796 € para a execución dunha nova rede de saneamento.

A este orzamento hai que sumarlle tamén os 460.128 euros que a Deputación destinou ás expropiacións das fincas afectadas polas obras, polo que o orzamento total ascende a máis de 1.290.000 euros.

As obras concéntrase no tramo de 3 quilómetros situado entre os puntos quilométricos 3,500 ao 6,500. A plataforma da estrada ampliarase dos 5 metros actuais a un total de 9 metros de ancho, contando con dous carrís de 3,5 metros e beiravías de 1 metro a ambos lados da calzada.

Tras os traballos de ampliación, renovarase a pavimentación da totalidade da vía, con 15 centímetros de zahorra, base de macadam e unha capa de rodaxe con triplo tratamento asfáltico.

Doutra banda, construirase unha rede de saneamento para recoller os vertidos das 80 vivendas situadas na zona de actuación, e que actualmente carecen deste servizo básico.

A nova rede de colectores construirase baixo as cunetas e constará de máis de 3.000 metros de canalizacións de PVC e 115 pozos de rexistro.