Galicia Ártabra Digital Noticias de Ferrol y la comarca de Ferrolterra.
O Concello de Ferrol, a través da Concellería de Benestar Social, incrementou a achega económica de fondos públicos a seis entidades sociosanitarias do noso municipio que combaten activamente a exclusión social e avogan pola integración e a igualdade en capacidades e dereitos a través da modificación dos convenios nominativos do ano 2017.
Son Asfedro, asociación histórica na nosa comarca que loita contra a drogadicción, Dignidad, Atención a persoas en risco de exclusión social, Alcer, a asociación para a loita contra as enfermidades do ril, Asociación Parkinson, que traballa por mellorar a calidade de vida dos afectados, Agamme, protección da infancia e adolescencia, e Asotrame, Asociación de transplantados de medula ósea.
No caso de Asfedro, a entidade quintuplica a súa achega municipal, de 3.000 a 15.000 euros. Tamén teñen dotación dúas de nova creación que non teñen cobertura da rede sanitaria autonómica, como Asotrame e Agamme, que percibirán 2.000 euros, e no cso de Alcer e a Asociación Parkinson, dobran a súa contía, de de 3.000 a 6.000 no primeiro, e de 6.000 a 12.000, o segundo. Por último, Dignidad tamén multiplica por dous a achega que viña percibindo no ano 2015 que pasa de 1.000 euros a 3000 neste ano 2017.
A proposta, que ven impulsada desde Benestar Social, foi aprobada hoxe no pleno ordinario de fin de mes. O Goberno entende que era unha cuestión de xustiza e equidade incrementar as achegas, que nalgúns casos eran de todo insuficientes, para entidades que traballan activa e intensamente por combater a exclusión social de persoas con menos recursos e mellorar a atención sociosanitaria dos enfermos de Parkinson.
APROBADAS A ORDENANZA DE ANIMÁIS E O REGULAMENTO DA CASA DA XUVENTUDE
No pleno ordinario de fin de mes, hoxe tamén quedou aprobado definitivamente a Ordenanza municipal de protección dos animais e convivencia responsable, logo de incorporar ao texto final as achegas feitas polos grupos da oposición e foi aprobado, de xeito inicial, o regulamento de uso e funcionamento da Casa da Xuventude, tamén coas achegas do resto dos grupos e das propias entidades xuvenís, non texto que aposta claramente pola autoxestión do espazo e por promover unha mocidade activa e implicada nas cuestións da súa cidade e tempo.
FESTIVOS LOCAIS 2018: MARTES DE ENTROIDO E LUNS DE CHAMORRO
A proposta da Concellería de Cultura, os festivos locais no vindeiro ano 2018 serán o martes de Entroido (13 de febreiro) e o Luns de Chamorro, 2 de abril.
DÍA DA NENA
Fora da orde do día, a Declaración Institucional polo día da Nena, proposta pola FEMP e que se celebra o vindeiro 11 de outubro, nunha data fixada pola ONU.
Tal e como expuxo a concelleira de Benestar Social, Muller, Mocidade e Igualdade, Saínza Ruiz, pon de manifesto “o compromiso dos Gobernos locais a hora de implementar políticas públicas destinadas a protección, a saúde e os dereitos sexuais e reprodutivos, a educación e o empoderamento económico e político, e a promoción dos dereitos das nenas”.
