O alcalde de Narón lamenta que o portavoz municipal do PP non diferencie unha modificación do orzamento do uso dos remanentes

O alcalde de Narón, José Manuel Blanco, saíu ao paso das declaracións realizadas polo portavoz do grupo municipal do PP, nas que se critica unha inexistente corrección dos orzamentos do Concello. “É lamentable que un grupo que aspira a formar parte do goberno na cidade non saiba diferenciar entre modificar o orzamento actual e o uso dos remanentes do ano pasado”, asegurou Blanco.

O rexedor local indiciu en que o grupo de goberno presentou na mañá deste mércores  unha modificación de crédito por importe de 3,4 millóns de euros, “pero o orzamento municipal non se toca”. O rexedor local explicoulle ao edil popular que “o que se fai é empregar os remanentes do ano pasado e neste caso non se destina ningunha partida gasto social porque esa área está totalmente cuberta no orzamento, debido a que para o equipo de goberno de Narón esa foi, é e será unha das prioridades á hora de deseñar cada ano o documento contable”.

Así mesmo, e en canto aos investimentos, Blanco indicou que “as obras que se executarán con cargo a este modificado de crédito son actuacións que non eran urxentes e podían esperar un tempo, polo que se priorizaron no seu día as incluídas no orzamento e agora realizaranse as contempladas no modificado de crédito, tamén moi importantes e necesarias pero de menor urxencia”.

Finalmente o alcalde anuncioulle ao portavoz do grupo municipal do PP de Narón que “aínda queda pendiente un superávit que, debido ás políticas impulsadas desde o Partido Popular non se puido utilizar, ao non estar permitido”