O Concello conmemora os 125 anos do Teatro Jofre coa mostra das escenografías orixinais

O Concello de Ferrol quere celebrar por todo o alto os 125 anos de historia do Teatro Jofre, buque insignia, espazo cultural por excelencia da cidade e unha icona da arquitectura modernista galega.

Farao coa exhibición de dúas das catro escenografías orixinais completas que se conservan do teatro, datadas no século pasado, nos anos 40 e 50, algunhas delas pintadas a man polo propio Felipe Bello Piñeiro, que destacan pola súa exquisita calidade artística. Vanse expor no teatro co ánimo de achegar aos ferroláns a oportunidade de descubrir e coñecer o propio patrimonio artístico do Concello de Ferrol, no canto de estar gardados nos arquivos locais.

Esta mostra, que hoxe presentaba en rolda de prensa o concelleiro de Cultura, Suso Basterrechea, ven a complementar a que se inauguraba o pasado 19 de maio na Sala de Proxectos do CTG, co gallo do 125 aniversario do teatro e que supuxo desempoar a carteleira orixinal, os planos construtivos do Jofre e elementos orixinais do mobiliario e da decoración.

“Falamos dun material que, coido, nunca fora exposto, como no caso do mural de Quessada, permite a recuperación do patrimonio cultural do noso municipio para a veciñanza”, manifestaba Basterrechea.

Estes decorados, tal e como relataba hoxe o concelleiro, eran propiedade do teatro, que os poñía a disposición das compañías que se desprazaban a Ferrol para compoñer o espazo da función. Os espazos representados neles son: un salón de baile, unha praza dun pobo, arcadas e deambulatorios góticos e unha selva ou xardín composta por fermosas árbores; que podían ser combinados entre eles e multiplicar así as posibilidades escénicas. Malia que as que se conservan son catro, por cuestións técnicas, únicamente é posible exhibir dúas que foron seleccionadas pola calidade artística, tamaño, posibilidades da montaxe e o estado de conservación.

As pinturas foron realizadas na súa meirande parte sobre tea, pero tamén sobre papel, colocadas sobre uns bastidores de madeira a medida que permitían a súa manipulación, así como a interacción dos actores durante a obra, utilizando as portas representadas ou xogando cós volumes do xardín. Na elaboración destes decorados, levada a cabo na baixocuberta do propio teatro, participaron notables artistas ferroláns e entre eles Bello Piñeiro, que deixou así documentada a súa afección pola escenografía teatral, así como a súa capacidade para representar tanto a beleza da natureza como a agochada na pedra, ou as vidreiras dos edificios que nos rodean.

A exhibición das teas abre as portas do 1 ao 13 de setembro no propio teatro, e poderase visitar de martes a venres de 17 a 20:30 horas. A maiores, e co fin de afondar na historia do teatro, organizaranse visitas guiadas os martes e xoves as 19:00 horas para grupos cun máximo de 20 persoas (con posibilidade de ampliar en función da demanda).

A fin de organizar as visitas, os interesados poderán inscribirse na seguinte dirección didactico.torrente@ferrol.es.