Obras destina un total de 24.000 euros na mellora da accesibilidade a centros educativos e sociais da zona urbana

A concellería de Obras está a executar obras de mellora de accesibilidade e seguridade viaria nos accesos a diferentes centros educativos e sociais da zona urbana do concello. En conxunto, a área que dirixe Pablo Mauriz está a investir 24.000 euros nestas intervencións que, ao abeiro do Plan de Acción Social da Deputación Provincial da Coruña, consisten en liñas xerais na reparación e pavimentación de rúas localizadas na contorna destes espazos.

Trátase de cinco actuacións diferentes. A primeira é na rúa Foro, en Xuvia, vía de acceso directo aos colexios Jorge Juan e CEIP Ponte de Xuvia, así como ás dependencias administrativas do antigo Concello nun tramo de 237 metros de ancho variable. Tamén se está a actuar na rúa Río Sil, en Piñeiros, que dá acceso á Igrexa parroquial e ao centro parroquial de Piñeiros, así como ás instalacións da Fundación AFAES, cunha lonxitude de 115 metros.

A rúa Moeche, en Freixeiro, de acceso á escola unitaria de Freixeiro, contempla unha intervención en 115 metros de lonxitude nun vial aínda en terras. Ademais, estase a actuar na rúa Río Masma, situada na Gándara, ubicada na contorna da igrexa, o centro social e o parque infantil das Vivendas do Bispo, cunha lonxitude de 85 metros e un aparcadoiro de 200 metros cadrados, e na rúa Finca Federico, en Santa Icía, de acceso directo á entrada do colexio CEIP A Solaina, en 125 metros de lonxitude.

Estes viais estaban pavimentados con triplo rego, moi antigo xa e deteriorado e deformado por numerosas canalizacións de servizos, que facían que a circulación do tráfico rodado e o tránsito peonil fosen perigosas polos desniveis e continuas fochas.