O alcalde de Narón lamenta o “continuo descoñecemento” que amosa o portavoz do PP

O alcalde de Narón, José Manuel Blanco, lamentou o “atrevido e continuo descoñecemento” amosado unha vez máis polo portavoz do grupo municipal do PP sobre o traballo realizado desde o goberno local. O primeiro edil naronés saíu ao paso das declaracións formuladas polo popular e explicoulle de novo que “o que se aprobou co Edusi foron unhas liñas de acción, que son de obrigado cumprimento, e unha vez que se conceden as axudas, como foi o caso, é o momento de deseñar os proxectos e marcar os seus prazos de execución”.

Blanco incidiu en que estas explicacións xa se realizaron no seu día, cando se solicitou o Edusi na primeira convocatoria, aprobándose no pleno esas liñas de acción de obrigado cumprimento, das que se deu boa conta coa documentación plenaria a todos os grupos da corporación. Esas liñas divídense en catro apartados: “Melloras no uso e na calidade das tecnoloxías da información e da comunicación” -e-administración, Smart cities…- ; “Favorecer a transición a unha economía baixa en carbono en todos os sectores” –eficiencia enerxética, humanización de barrios…-; “Conservar e protexer o Medio Ambiente e promover a eficiencia de recursos” –desenvolvemento do patrimonio cultural, turismo, etc.-; e “Promover a inclusión social e loitar contra a pobreza e calquera forma de discriminación” –estratexias urbanas, cohesión social, conciliación, voluntariado…-.

Así mesmo, en canto ás declaracións realizadas polo portavoz popular sobre o destino dos fondos Feder recibidos anteriormente de Europa, Blanco lamentou que, a maiores da información entregada aos grupos no seu día, non tivera a oportunidade de ver o cartel que leva meses colocado na entrada do Concello. No mesmo expecifícanse tanto as obras como os investimentos realizados con cargo ao programa Feder 2007-2013: A Escola infantil de Xuvia -761.243 euros-; un pavillón polideportivo cuberto -976.544-; o edificio de Aula rural en Aldea Nova -844.336-; a climatización do edificio de aulas do Pazo da Cultura -355.780-; unha ponte sobre a vía de FEVE na rúa da Torre -500.000-; o sorterramento na rúa Virxe de Covadonga baixo a vía de FEVE -685.000-; climatización e aire acondicionado no Pazo da Cultura -774.876-; instalación fotovoltaica e solar térmica no Concello -448.654-, no Centro de Formación para o Emprego -276.436-, no edificio da Policía Local e Servizos -144.754- e no Pazo da Cultura -232.522-; a instación e infraestrutura de rede de internet en zonas rurais -72.343-; a reforma da ponte sobre o río Freixeiro na estrada Miguel de Cervantes -522.864-; a reforma forestal da ribeira de Xuvia na citada ría -344.694- e a rehabilitación e o acondicionamento do parque forestal municipal do Couto -232.642 euros-. A falta de interese e de coñecemento por parte do portavoz municipal do PP chega a tal punto, indicou Blanco, que parte das obras realizadas fixéronse durante o mandato no que o PP formaba parte do goberno local de Narón.

O rexedor local asegurou que “este tipo de declaracións e informacións –en relación ás realizadas polo portavoz popular na cidade- veñen a demostrar a interinidade do seu cargo”. “Unha vez máis temos que lamentar o gran descoñecemento do portavoz do PP de Narón sobre a realidade do noso concello e, polo tanto, das actuacións que se realizan ou se proxectan de cara á mellora da calidade de vida de todos os nosos veciños e veciñas, un obxectivo que non ten límites e que nunca se pode dar por rematado”, subliñou Blanco.