Galicia Ártabra Digital Noticias de Ferrol y la comarca de Ferrolterra.
A Comisión da Horta de Quinín, composta pola Agrupación Instrutiva de Caamouco e a Asociación Betula, convoca unha nova sesión de posta en valor da parcela. A xornada de voluntariado está programada para o vindeiro 6 de maio, a partir das 10:00 horas da mañá.
Os traballos programados baséanse na retirada de maleza e recollida de pedras, para preparar o terreo para as futuras plantacións. Tamén se eliminará o lixo que aínda se acumula nalgúns puntos da parcela. Ao mesmo tempo, levarase a cabo unha delimitación da propiedade. A organización ofrecerá a media mañá un almorzo.
Esta é a terceira xornada de voluntariado que se organiza para recuperar a coñecida como Horta de Quinín. O obxectivo é transformar esta leira, en desuso dende hai 18 anos, nun espazo verde didáctico polivalente no que se poñan en valor as especies autóctonas e se promova o respecto ao medio ambiente e á biodiversidade.
A intención dos responsables do Horta de Quinín é que o proxecto estea a pleno funcionamento antes de que remate o ano. Será entón cando se leve a cabo unha plantación de froiteiras autóctonas, como maciñeiras, pereiras e ameixeiras, que ocuparán a meirande parte da superficie. O resto do terreo destinarase a microespazos para cursos de formación e a hortos individuais, destinados á veciñanza que os solicite.
