O alcalde de Narón defende a transparencia no acceso á información facilitada sobre a praza do colexio e o aparcamento de Xuvia

O alcalde de Narón, José Manuel Blanco, saíu ao paso das declaracións realizadas polo portavoz de Eliximos Narón Electores (ENE) sobre a praza e o aparcadoiro de Xuvia. En canto ao informe técnico que o edil asegura que non lle foi entregado, Blanco asegurou que tal afirmación é falsa. “Non foi un, senón que foron dous, os informes elaborados polo arquitecto técnico municipal con motivo da aprobación do proxecto inicial da praza do colexio de Xuvia e do primeiro proxecto de reforma”, e subliñou que “ambos documentos constan na pertinente documentación do pleno e aprobounos o pleno municipal, cos votos favorables de vinte dos vinte e un concelleiros da corporación”.

En canto ao informe xurídico, o alcalde recordoulle ao edil de ENE que no caso de considerar que o elaborado adoecía dalgún erro ou omisión, era precisamente “nese mesmo momento cando debería facelo constar”. En lugar diso, o que o Sr. Casal fixo foi dar estrito cumprimento ao que a funcionaria sostía nese informe e así foi presentanda unha solicitude asinada por sete edís da corporación. Por iso Blanco Suárez lembralle ao concelleiro que “ninguén pode ir en contra dos seus propios actos. É un principio xurídico que llo regalo”. 

Tal e como se acreditou no informe solicitado polos citados concelleiros, “non se tiña aprobado nesa data ningún proxecto para o aparcamento disuasorio”, polo que ao presidente da AVV Altea de Xuvia comunicóuselle a posibilidade de ver no Concello os documentos do asunto pero nunca un proxecto inexistente.

Por último, en cando ás manifestacións realizadas sobre o persoal municipal, procederase a darlle traslado á Xunta de Persoal, apuntou.  Blanco lamentou unha vez máis que o concelleiro de ENE continúe apostando por realizar a súa labor desde a oposición nunha clara liña de paralización da actividade municipal e descrédito do persoal, siguiendo as directrices daqueles que se escudan no anonimato para atacar aos funcionarios do Concello.