O BNG de Narón da resposta ás manifestacións do PP

O Bloque Nacionalista Galego de Narón insiste en que a Estrada de Castela é hoxe en día unha vía urbana e que precisamente por iso a súa titularidade debería pasar a mans municipais, sempre, iso si, que a actual propietaria, a Xunta de Galiza, acometa as obras de humanización precisas.

O Consello Local da organización nacionalista manifesta a súa sorpresa perante e actitude inquisidora do Partido Popular, pois “semella negarnos o exercicio do noso dereito a presentar emendas aos orzamentos da Xunta”. “Temos representación no Parlamento Galego”, apunta o Consello Local de Narón, “e, polo tanto, temos o dereito e a obriga de presentar propostas que permitan mellorar a calidade de vida da veciñanza de Narón”.

O BNG láiase de que o portavoz do PP “dixira tan mal a acción política doutra formación” e asegura non entender “cal é o problema” para que a formación á que representa cuestione a construción dun novo centro de saúde, dun centro de ensino primario e secundario que cubra a demanda actual ou de que se executen obras de saneamento coa colaboración da Xunta como ten feito recentemente con outros moitos municipios, gobernados maioritariamente, iso si, por compañeiros do seu propio partido.

“Nós”, conclúe o comunicado do BNG de Narón, “entendemos a crítica e o traballo que lle toca ao PP desde a oposición na corporación local, mais de aí a negarlle ás veciñas e veciños de Narón a posibilidade de recibir uns servizos de calidade por parte da administración competente, hai un mundo”.