O BNG naronés levará ao pleno unha moción reclamando a transferencia da AP-9 á Xunta

O grupo municipal do Bloque Nacionalista Galego de Narón vén de presentar no Rexistro do Concello unha moción para o seu debate no pleno ordinario de novembro, a celebrar o vindeiro xoves 24, coa que reclama a transferencia á Xunta de Galiza da autoestrada AP-9. O texto, idéntico ao que se está a levar a todas as corporacións nas que o BNG ten representación, insta ao Goberno central e ao Ministerio de Fomento a retirar a disconformidade coa tramitación da Proposición de Lei Orgánica de transferencia da titularidade e competencias da AP-9 á Comunidade Autónoma de Galiza, aprobada por unanimidade do Parlamento de Galiza ao remate da lexislatura anterior. Ademais, pide a todos aos grupos políticos con representación nas Cortes Xerais axilizar a súa tramitación e aprobala nos termos consensuados no Parlamento de Galiza, e convida á corporación naronesa a «rexeitar o rescate multimillonario con fondos públicos de autoestradas co único fin de salvar a banca e as construtoras que as xestionan, alén de instar a que os recursos públicos se destinen prioritariamente ao rescate de autoestradas en beneficio das usuarias e usuarios finais, para rematar coas peaxes abusivas da AP9».

O portavoz do grupo municipal do BNG de Narón, Pablo Villamar, cualificou de «estafa legal» as peaxes da AP-9 e, para rematar con elas, sinalou que o único xeito é «rescatar a concesión e transferila á Xunta de Galiza», xa que, lembrou, «esta autoestrada está amortizada abondo, pois desde a súa apertura, nos anos 70, leva recadado máis de 2.200 millóns de euros, xerando 750 millóns de beneficio que, ademais, non ingresa nin sequera o Estado, senón ás grandes corporacións e fondos de investimento estranxeiro que a levan xestionando desde a súa privatización por parte do Goberno Aznar en 2003».

Villamar subliñou, ademais, que os argumentos esgrimidos polo Goberno central a través do Ministerio de Fomento para rexeitar esta iniciativa que conqueriu o apoio unánime do parlamento nacional de Galiza son «erróneos», pois «por moito que digan, non é unha vía internacional (remata en Tui) e tampouco conecta entre si as infraestruturas portuarias e aeroportuarias da nosa franxa atlántica».

O voceiro nacionalista asegurou que as peaxes son abusivas, «das máis altas do Estado», e que todos eses ingresos, de máis de 300.000 euros diarios, non repercuten «en absoluto na mellora do servizo nin están a bonificar aos usuarios habituais da vía, como si fai Itínere noutras autoestradas do Estado». Villamar incidiu en que o Goberno central mantén unha política discriminatoria con Galiza e, nesa liña, lembrou que recentemente «decidiu rescatar con 8.000 millóns as concesións ruinosas de varias autoestradas madrileñas adxudicadas a Bankia e construtoras afíns ao PP».