Especialistas reúnense en Ferrol no Congreso da Sociedade Galega de Endocrinoloxía

specialistas en Endocrinoloxía e Nutrición de toda Galicia reúnense esta fin de semana en Ferrol, no 29 Congreso da Sociedade Galega de Endocrinoloxía, Nutrición e Metabolismo. Durante o venres 18 e o sábado 19 de de novembro, na Fundación Abanca, máis de 150 asistentes abordarán os últimos tratamentos, avances, e melloras neste eido. Como indica o responsable do Comité Organizador, e especialista en Endocrinoloxía do Complexo Hospitalario Universitario de Ferrol, Diego Bellido, «considéranse os temas e as enfermidades de maior prevaleza ou novidades, e van acudir profesionais doutras especialidades». Ademais, «asistirán tamén profesionais que teñen exercido como endocrinólogos nesta área sanitaria, e que agora desenvolven o seu traballo noutras áreas de territorio nacional e internacional, e poden achegar as súas experiencias».

O Congreso abrangue, no seu primeiro día 18, como optimizar a consulta con ferramentas dixitais, un taller sobre o método de lectura da glicosa monitorizado, en diabetes; un simposio sobre a Obesidade, tratando alternativas terapéuticas, a súa relación co cancro, as novidades no tratamento farmacolóxico ou o seu tratamento cirúrxico. Neste senso, o Complexo Hospitalario Universitario ferrolá colabora con outros hospitais de Galicia en estudos clínicos relacionados coa diabetes e o cancro de mama e colon; e está a desenvolver o proxecto IGOBE, de abordaxe da obesidade en grupo. Xunto con isto, haberá un encontro co experto que se centrará no manexo actualizado do fallo intestinal, cunha experta en nutrición e a alternativas terapéuticas para esta patoloxía pouco habitual. Tratarase tamén a Esteatohepatite non alcohólica, patoloxía emerxente, e novas opcións terapéuticas en acromegalia.

Ademais, leranse as comunicacións orais escollidas, 6 entre un total de 45, entre as que figura unha comunicación realizada por profesionais da área sanitaria ferrolá e que aborda o Rexistro Dietético Fotográfico, ferramenta empregada no Complexo Hospitalario Universitario de Ferrol coa que se axuda ó paciente a valorar a súa inxestión de alimentos, se é correcta ou non, e como mellorala.

No segundo día desta xuntanza de especialistas, os encontros co experto abordarán o papel do especialista en Endocrinoloxía e nutrición no manexo dos trastornos de identidade de xénero; o tratamento da síndrome metabólica; ou o manexo clínico do cancro de tiroides e as novas guías. Outro simposio valorará as novas terapias combinadas no ámbito da Diabetes tipo 2, «coa presenza de especialistas de gran nivel científico tanto no ámbito nacional como internacional, como o profesor Knopp, de Dinamarca».

Por último, a a conferencia de clausura, Fisiopatoloxía do hipotiroidismo asociado á enfermidade severa, correrá a cargo de Joaquín Lado Abeal, da División de Endocrinoloxía do Departamento de Medicina da Universidade de Texas, catedrático, natural de Ferrol, pero que actualmente desenvolve a súa actividade profesional en Texas.

Lea también

O Teatro Colón acolle a gran festa do teatro escolar e afeccionado da provincia

Un ateigado Teatro Colón da Coruña acolleu a noite do venres a gala de clausura …