O Pazo da Cultura de Narón acolle este venres un Festival Solidario

O Pazo da Cultura de Narón acollerá este venres 4 un Festival Solidario organizado polo Concello en colaboración co Padroado da Cultura de Narón e a Asociación Centro de Recursos Solidarios de Narón. A edil de Acción Social, Catalina García; o presidente da citada asociación, José Manuel González, e o cantautor Marcos Mella presentaron esta mañá o evento, cuxa recadación se destinará ao Centro de Recursos Solidarios de Narón. O prezo das entradas para poder asistir é de cinco euros por persoa e xa están á venta na taquilla do Pazo da Cultura. Así mesmo, habilitouse unha Fila 0 para as persoas que non poidan acudir, que terán a oportunidade de ingresar os seus donativos na conta: ES95-0238- 8158- 060600070448. O Festival Solidario dará comezo ás 20 horas.

Os cantantes Rocío Varela, Marcos Mella, Hilda Rock, Dani Ríos e Andrés Rodríguez comparten protagonismo no cartel deste evento xunto co Mago Deimi, a monologuista naronesa Eva Castro e a Escola de Baile Jesús Quiroga. A presentadora do acto será Isabel Acedo e os menores terán a oportunidade de fotografiarse con Bob Esponja, tamén presente.

A concelleira de Acción Social destacou a cantidade e calidade das actuacións que se sucederán no Pazo este venres, a cuxos protagonistas agradeceu a súa colaboración de xeito desinteresado. García animou aos naroneses e á cidadanía en xeral a «acudir a este festival para encher o Pazo da Cultura de Narón de solidaridade». A edil avanzou ademais que no transcurso do acto se levará a cabo o nomeamento do Colaborador do ano do Centro de Recursos Solidarios de Narón, cuxo nome non se desvelará con anterioridade, como é habitual.

«Narón por todas as ocasións anteriores e polos eventos que organizamos co Centro de Recursos Solidarios podemos dicir que é un concello moi solidario», valorou García. A edil naronesa recordou que o Concello organiza un desfile solidario para a recollida de alimentos e roupa no primeiro semestre de ano e no segundo este festival, cunha entrada solidaria, destinada tamén aos usuarios destas instalacións, nas que se atenden actualmente a preto de 900 familias de Narón e comarca. Do total destes usuarios, tal e como indicou José Manuel González, 114 son menores de 0 a 5 anos.

As instalacións do Centro de Recursos Solidarios de Narón, localizadas na avenida Gonzalo Navarro do polígono industrial de Río do Pozo, parcela 23, permanecen abertas os luns, martes, xoves e venres de 9:30 a 13 horas e os mércores de 16:30 a 20 horas.