Jorquera reclamou no mitin do BNG na Gándara unha facenda pública propia

O exportavoz do BNG no Parlamento Galego, Francisco Jorquera, reclamou na tarde deste martes na Gándara unha Facenda pública propia que lle permita á administración autonómica dispor da capacidade de recadar impostos para decidir logo en que sectores ou servizos investilos.

Jorquera, que botou man das balanzas fiscais para xustificar o posicionamento da organización nacionalista, lembrou que en Galiza se recadan anualmente máis de 12.000 millóns de euros, 3.300 millóns de euros máis ca o orzamento total da Xunta de Galiza. «Non é certa a imaxe de país subsidiado que queren dar de nós; é unha falacia», dixo, e apuntou ao modelo fiscal vasco que lle ten permitido a Euskadi estar entre as dez sociedades do mundo con maior benestar.

«Ese é o modelo que nós queremos para Galiza: termos capacidade para recadar os impostos e decidir en qué investilos», incidiu antes de explicar que hai 4.200 empresas galegas ou que operan no país que pagan o imposto de sociedades en Madrid. «Coa asunción dun sistema como o do concerto vasco ou navarro poderiamos desenvolver outro tipo de políticas, blindando e mellorando os servizos sociais e creando emprego», sinalou.

Jorquera, que pecha a lista do BNG pola provincia da Coruña, insistiu en que só con maior soberanía será posíbel mellorar a calidade de vida das galegas e dos galegos. «O marco actual non serve», dixo, «e por iso temos que mudalo, algo que só será posíbel se o BNG chega á Xunta».