Narón abre o prazo de inscrición ao Mercadiño Artesán do Oenach Atlántico de Sedes

As persoas interesadas en instalar os seus postos de venta de produtos artesáns no Mercadiño Artesán do Oenach Atlántico de Sedes poderán facelo a partir do vindeiro luns, día 13. A celebración desenvolverase nas xornadas do 30 e o 31 de xullo no recinto feiral do Trece e nas súas inmediacións, sendo preciso anotarse -de balde, para reservar os espazos que ocuparán os diferentes postos- a través do correo electrónico: d.canovas@naron.es ou do número de teléfono 626 378 685.

O Oenach Atlántico de Sedes é unha das citas máis recoñecidas do calendario festivo da localidade naronesa desde hai case dúas décadas. Foi declarado Festa de Interese Turístico Galego pola Xunta de Galicia no ano 2014, sendo a primeira do municipio en obter esta distinción. Actividades culturais, deportivas e gastromía completarán como cada ano o programa a desenvolver no Oenach Atlántico de 2016 nesta parroquia naronesa.