25 profesionais inician a súa formación residente na Xerencia Integrada de Ferrol

Os e as profesionais da Xerencia Integrada de Ferrol deron a benvida na mañá deste venres, no salón de actos do Hospital Arquitecto Marcide do Complexo Hospitalario Universitario de Ferrol, ós 25 novos profesionais que inician a súa formación tanto no Complexo como nos distintos centros de saúde ferrolás. Do total dos 25 novos profesionais, 19 son facultativos: 6 formaranse en Medicina Familiar e Comunitaria, 1 en Cirurxía Ortopédica e Traumatoloxía, 1 en Medicina Interna, 1 en Obstetricia e Xinecoloxía, 1 en Pediatría, 1 en Psiquiatría, 1 en Psicoloxía Clínica, 1 en Radiodiagnóstico, 1 en Farmacia Hospitalaria, 1 en Oftalmoloxía, 1 en Dermatoloxía, 1 en Uroloxía, 1 en Cirurxía Xeral, e outro en Neuroloxía.

Ademais, comezan a formarse tamén 2 residentes de Enfermaría Obstétrico-xinecolóxica (matrona); e 4 residentes de Enfermaría Familiar e Comunitaria. Con respecto a isto, destacar novamente que Ferrol, xunto con Coruña, foi das primeiras Xerencias de Galicia en acreditar a formación desta especialidade de Enfermaría Familiar e Comunitaria.

Na Xerencia ferrolá, hai un total de 17 especialidades acreditadas; e estaranse a formar, coas novas incorporacións, neste novo período 2016-2017, un total de 86 profesionais nos distintos ámbitos, coordinados e supervisados por 54 titores e os correspondentes colaboradores docentes. Durante o acto desta mañá, o xerente, Ángel Facio Villanueva, polo presidente da Comisión de Docencia no ámbito hospitalario, Ramón López de los Reyes; e o presidente da Comisión de Docencia da Atención Familiar e Comunitaria, Luis Ramil Hermida.

O pasado 12 de maio despedíase ós 22 profesionais que remataban a súa formación residente na Xerencia Integrada de Ferrol; e hoxe dáse a benvida a estes 25 novos profesionais.

Rotación e adquisición de coñecementos

No caso da especialidade en Medicina Familiar e Comunitaria, para completar a súa formación, os seis novos médicos residentes comezarán traballando os primeiros meses nun centro de saúde da Xerencia, e posteriormente rotarán nos centros hospitalarios. Pola súa banda, as e os profesionais residentes do resto de especialidades realizarán a partir de hoxe as rotacións e gardas correspondentes nos hospitais do Complexo Hospitalario Universitario.

De xeito global, a supervisión do traballo destes novos 25 residentes corre a cargo dun total de 54 titores na Xerencia ferrolá, ademais dos dous coordinadores docentes, e que serán a referencia dos residentes durante a súa formación. Ó final de cada rotación, os residentes son avaliados polo seu titor, cualificándoos en base ós seus coñecementos e actitudes. Estes resultados, xunto cos méritos adicionais, como sesións clínicas ou investigacións que cada residente ten, establecen a súa avaliación final. Neste senso, o presidente da Comisión de Docencia, Ramón López de los Reyes, fixo referencia ó bo facer dos titores e ó traballo dos colaboradores docentes, facéndoo extensivo “a tódolos traballadores, porque teñen que compartir o día a día con eles”.