Narón organiza unha «Campaña de primavera» dirixida ao sector comercial

A concellería de Promoción Económica de Narón, dirixida polo edil Pablo Villamar, impulsa a Campaña de primavera do comercio na cidade, que se desenvolverá desde o 15 de maio ata o 15 de xuño coa colaboración da Asociación Comercio de Narón (ACN).

«Un total de dezaoito establecementos da localidade sumáronse á convocatoria e ofrecerán durante este período importantes descontos nos seus establecementos, en produtos e servizos, e tamén algúns agasallos para a clientela. Ao final da campaña sortearase un teléfono móbil Iphone 6S entre os participantes». Así o explicou o Villamar na presentación desta iniciativa, onde acudiron tamén a presidenta da Asociación Comercio de Narón, Olga Ameneiro, e Mónica Cereijo, propietaria dun dos establecementos colaboradores.

Villamar valorou a colaboración dos comerciantes de Narón e subliñou a importancia da mesma «de cara a promocionar ao sector na localidade, porque defendemos os seus estándares de calidade e pensamos que o comercio tamén é unha forma de facer Narón e de xerar riqueza e emprego cos que poder manter unha cidade viva».

Pola súa parte, a presidenta da ACN agradeceu a colaboración prestada polo Concello «para apoiar unha vez máis ao comercio local», destacando «a necesidade de mantela impulsando novas accións conxuntas». «Nesta campaña tentamos introducir novidades e premiar aos nosos clientes cun produto moi preciado hoxe en día, un móbil de última xeración», explicou Olga Ameneiro. Para participar no sorteo do Iphone 6S é preciso realizar unha compra por un importe superior a 30 euros nos citados establecementos e gardar o ticket, que será obrigado presentar no caso de resultar gañador.

«Ese mesmo día terán que subir unha fotografía simpática ao concurso de Facebook a través dunha aplicación que se habilitará ao efecto pódendose subir tantas como compras se realicen, e promoverase unha acción novidosa que consistirá no reparto de publicidade nunha bicicleta que percorrerá as zonas de máxima afluencia comercial da localidade e na que se repartirán folletos informativos sobre esta campaña», explicou a presidenta.

Nesta iniciativa participan os establecementos: Óptica La Gándara; Centro de estética Rocío Rodríguez; Óptica Valero; Lucía Vega (asesoría); Mercería paquetería Chandy; Loxe (artesanía); Sikna (deseño); Temadi; Bioreona; Mercería paquetería Losi; Parafarmacia Andoriña; Alain Afflelou; Boutique e perruquería Mónica Cereijo; Mercería Lazos, Calzados Mara, Punto PC; A tenda de Sara e Mercería Mari Josi. As persoas interesadas en coñecer a ubicación destes comercios poden localizalos a través da dirección: www.comerciodenaron.es, a través dun mapa virtual.

«Confiamos en que ao igual que as campañas que realizamos anteriormente esta sexa tamén un éxito», apuntou Villamar, que aludiu á importancia de que a veciñanza colabore na iniciativa realizando as súas compras en establecementos da localidade.