Galicia Ártabra Digital Noticias de Ferrol y la comarca de Ferrolterra.
O director técnico do Padroado da Cultura de Narón, Luciano Fernández, recibirá este sábado, día 30, o Premio de Honra concedido pola organización da Mostra Internacional de Teatro Universitario de Ourense (Miteu), que este ano alcanza a súa vixésimo primeira edición, en recoñecemento á súa labor como programador profesional no Pazo da Cultura. O acto de entrega comezará ás 20.00 horas no Teatro Principal de Ourense.
A distinción constitúe “un recoñecemento á labor dos programadores profesionais que aman o teatro”, tal e como indicaron desde a organización. Así mesmo, incidiron en que o traballo de Luciano Fernández en Narón “é fundamental nun Concello exemplar en programación, pola súa implicación co teatro e o ensino teatral coas escolas municipais de teatro”. A encargada de entregarlle o premio será a directora do Teatro Principal de Ourense, Olga Mojón.
No transcurso da Mostra Internacional de Teatro Universitario de Ourense, iniciada o pasado 15 de abril, preséntanse habitualmente traballos interpretativos realizados polo alumnado das Aulas de Teatro da Universidade, dando así por culminada a actividade do curso.
