Galicia Ártabra Digital Noticias de Ferrol y la comarca de Ferrolterra.
Como parte da programación de actividades de dinamización lingüística do Concello de Ferrol, a concellería de Normalización Lingüística ven de propoñer aos mestres de Primaria a actividade O conto viaxeiro, dirixida rapazas e rapaces de de 2º, 3 º, e 4º de Educación Primaria.
O obxectivo destes obradoiros é achegar a lingua galega aos pequenos e pequenas e ás familias ferrolás dun xeito atractivo e ao tempo aumentar a presenza de recursos educativos na nosa lingua na rede.
A actividade consiste en realizar un conto ilustrado de xeito colectivo, ao longo de varias sesións, e en cada unha delas participa un grupo diferente de nenos e nenas que se encargarán de idear, escribir e ilustrar unha parte dese futuro conto.
A sesión de cada grupo desenvolverase no seu correspondente centro escolar e estrutúrase en tres partes: presentación e explicación da estrutura básica do conto (presentación, nó e final); selección da ilustración do grupo precedente; elaboración da propia proposta de continuidade e das ilustracións individuais para presentarlle ao próximo grupo, e a gravación do vídeo conto.
O Conto Viaxeiro inclúe un blog no que, ao remate da actividade en todos os centros, se difundirán os dous produtos finais, o vídeo conto e o conto en formato dixital.
Os centros interesados en participar deberá cubrir a ficha de inscrición que se achega e remitila ao correo electrónico gnl@ferrol.es. Poden inscribir dous grupos cun máximo de 30 alumnos cada un e en función da demanda participarán un ou os dous. De haber moita demanda , atenderase por orde de inscrición.
O prazo de recepción deste escrito comenza hoxe e remata o 3 de marzo. De necesitar máis información, poderán solicitala a través do citado correo ou chamar ao teléfono 981 94 40 14 en horario de 08:30 a 14 horas. A actividade desenvolveuse o pasado ano no Concello de Ferrol e pódese ver o resultado na seguinte ligazón: https://contoviaxeiroferrol.wordpress.com/
