O Goberno ferrolán levará a pleno a ordenanza de Transparencia

O Concello de Ferrol levará a pleno o día 25 de febreiro deste mes a Ordenanza de Transparencia, despois de que na Comisión celebrada esta mañá contara co voto favorable dos grupos de goberno e de Ciudadanos e a reserva do BNG e o PP.

Así o explicou o concelleiro de Participación Cidadá e Normalización Lingüística do municipio, Álvaro Montes, quen destacou ao termo da Comisión que se trata dunha «ordenanza participada e consensuada. Os grupos políticos da corporación puideron facer as súas aportacións ao borrador», sinalou.

Álvaro Montes explicou que dado que hoxe se publica no DOG a Lei 1/2016 da Orde de Transparencia e bo goberno da Xunta de Galicia, na Comisión modificouse cunha enmenda in voce o apartado correspondente ás reclamacións que poidan facer os cidadans ás entidades locais. «Segundo determina a Xunta de Galicia no caso galego corresponderán agora ao Valedor do Pobo», recordou o edil.

Sumado a isto avanzou que «nunhas semanas estará dispoñible o portal de transparencia co que se irán cumprindo con todos os compromisos de ética e transparencia que fixou o goberno como parte dun dos seus compromisos ineludibles ante os cidadáns».

Formulario de transparencia

Doutra banda, Álvaro Montes informou que o Formulario de transparencia contará con novas instrucións para a súa cumplimentación. «Se terá que incluir o valor catastral dos inmobles e o ano de matriculación dos vehículos, co obxectivo de dar axilidade e homoxeneidade á información compartida polos concelleiros da Corporación municipal», sinalou o edil de Participación.

Montes fizo constar que a información que os concelleiros aporten neste formulario será actualizada todos os anos, dando resposta así ao compromiso de transparencia ante os cidadáns que asumiu o presente o goberno local.

Actividades infantís

Finalmente, na Comisión tamén se dou conta da próxima programación de actividades que está previsto desenvolver dende a área de Participación, Novas Tecnoloxías e Normalización Lingüística en colaboración coa Concellería de Cultura.

«Serán actividades para nenos de entre 3 e 12 anos que terán lugar os sábados pola mañá nos barrios da cidade e das que se dará conta polo miúdo nos vindeiros días», explicou Montes.