«Narón non necesita un médico, necesita un centro de saude» (Guillermo Sánchez)

Terra Galega celebrou este domingo, día 17, en Narón mitins nas parroquias de Pedroso e San Xiao.

O local da Sociedade Cultural e Recreativa A Pombiña, de Pedroso, acolleu a primeira das sesións, que comezou ás 12.30 horas e na que participaron, ademais do candidato á Alcaldía por TEGA, José Manuel Blanco, o secretario xeral do partido, Guillermo Sánchez Fojo, e dúas integrantes da candidatura pola parroquia, Beatriz Couce e María Díaz. As candidatas destacaron a traxectoria de 36 años de traballo do equipo do que forman parte e tamén incidiron na necesidade de que Narón continúe avanzando e non dea pasos atrás “nin para coller impulso”, como sinalou María Díaz.

O secretario xeral de Terra Galega, Guillermo Sánchez Fojo, aludiu ao apoio que a parroquia de Pedroso deu sempre ao partido nos comicios locais. Sánchez Fojo defendeu o traballo realizado durante o último mandato polo cuatripartito naronés e incidiu na importancia do traballo conxunto cos veciños e veciñas. “Cando hai un problema podedes chamarnos porque en Narón non nos escondemos nin hai que pedir audiencia para falar cos concelleiros”, asegurou. Denunciou tamén Sánchez Fojo as prácticas caciquís das políticas do PP, referíndose ao reparto das axudas en administracións supramunicipais como a Deputación da Coruña, e criticou que fose precisamente o candidato do PP á Alcaldía local, Miguel de Santiago, unha das persoas que apoiaron co seu voto esas políticas, en detrimento dos veciños e veciñas de Narón. As últimas palabras da intervención de Sánchez Fojo foron para o presidente da Xunta, Alberto Núñez Feijóo, que onte dixo na localidade que Narón “necesita un médico porque está enfermo”. “O que nos fai falta é un centro de saúde”, subliñou o secretario xeral de TEGA, que denunciou que o compromiso adquirido pola Xunta no 2007 aínda non se materializou.

Pola súa parte, o candidato de Terra Galega, José Manuel Blanco, explicou aos asistentes que está pendiente a ampliación da rede de alcantarillado na zona da Portela, unha intervención que depende da Xunta –da incorporación dos remanentes necesarios para facer a obra- e que continuará por terreos de San Sadurniño.

Blanco comprometeu en Pedroso o mantemento do apoio á Sociedade A Pombiña e tamén o inicio dos traballos de recuperación da reitoral de Pedroso, cuxo contrato de obras se licitará proximamente por 361.000 euros e que será unha realidade grazas as xestións e á presión realizada polo equipo de Terra Galega na Deputación da Coruña. Con cargo a esta partida as instalacións serán un centro de dinamización da parroquia, tal e como indicou o candidato de TEGA.

Finalmente, Blanco destacou o papel que xogaron no deseño do que hoxe é Narón persoas como José Lombao –exconcelleiro presente no acto de hoxe en Pedroso- e recordou as dificultades atravesadas cando no ano 1985 se fixo o Plan de Urbanismo cuxa revisión, tal e como explicou, está pendiente da aprobación definitiva da Lei do Solo de Galicia por parte da Xunta.

En San Xiao

No segundo dos mitins da xornada deste domingo, en San Xiao, acompañou a Blanco e Sánchez Fojo a número dous da candidatura, Marián Ferreiro, que destacou o traballo realizado na parroquia e tamén os proxectos de futuro que impulsa Terra Galega. Tanto Sánchez Fojo como Blanco valoraron o papel que xogou sempre Marián Ferreiro no partido, implicándose no proxecto desde o primeiro día que formou parte das Xuventudes da formación.

O candidato de TEGA subliñou que “San Xiao vai ter unha representación fundamental no vindeiro mandato municipal da man de Marián Ferreiro, que é unha persoa moi vencellada ao partido”. Recordou Blanco que a candidata traballa desde hai anos como persoal de confianza na área administrativa e incidiu en que “é a miña man dereita e esquerda e no futuro terá esa mesma forza como concelleira dentro do grupo de goberno de Narón”.

En referencia ás obras realizadas en San Xiao, Blanco explicou que nos últimos catro anos se invertiron case 300.000 euros, que permitiron executar varias actuacións do Plan de Obras e Servizos e un parque infantil e outro biosaudable. Entre as xestións máis relevantes apuntou o candidato de TEGA ao proxecto que permitirá habilitar unha senda peonil que discurrirá paralela á estrada da Deputación, valorada en 110.000 euros. Os terreos necesarios para a obra, que se executará tralo asfaltado do vial, están a disposición da Deputación desde hai máis dun mes, tal e como indicou Blanco, que instou á administración provincial a rematar a tan necesaria e demandada ampliación deste vial.

O candidato de TEGA falou tamén en San Xiao dos avances nas obras do saneamento e incidiu en que está pendente o servizo para as vivendas localizadas entre A Verruga e O Salgueiral.

Para finalizar o acto Blanco aludiu tamén ao presidente da Xunta, Alberto Núñez Feijóo. “En realidade está facendo a nosa campaña, porque vai por aí dicindo que non hai que mover nada, que é mellor seguir como estamos, polo que en Narón debe manterse o goberno Terra Galega”, apuntou. Blanco pediu o voto para TEGA o vindeiro 24 de maio e animou aos veciños a acudir a votar porque o futuro de Narón decidirase nas urnas, que son as que realmente dirán quen vai estar á fronte do Concello os vindeiros catro anos.