«Temos a obriga de poñer en valor o mosteiro do Couto» (Pablo Villamar)

O candidato do Bloque Nacionalista Galego-Asembleas Abertas á Alcaldía de Narón, Pablo Villamar, asegurou este sábado, día 16, que o mosteiro do Couto “é un símbolo da nosa identidade como Concello, como comarca e como nación”, polo que se comprometeu a principiar as negociacións entre o Concello de Narón e o resto das administración non só para conseguir a cesión de uso do cenobio –hoxe propiedade da Igrexa católica- senón tamén dos cartos necesarios para a súa rehabilitación.

O candidato nacionalista anunciou este compromiso no decurso dunha xornada que a organización política desenvolveu no Couto, primeiro cunha visita ao mosteiro guiada polo historiador e arquiveiro de Narón, Andrés Pena Graña, e posteriormente nun acto público que tivo lugar no local social do Couto. “Cómpre rehabilitarmos o mosteiro, mais tamén dotalo de contido”, dixo, “e por iso consideramos imprescindíbel que a documentación que se xerou neste mosteiro regrese aquí”.

A aposta pola recuperación do mosteiro é unha das propostas que incorpora o programa electoral do BNG-Asembleas Abertas de Narón na área de cultura. Na véspera do Día das Letras Galegas, Pablo Villamar defendeu as políticas de promoción e difusión da lingua galega, así como do conxunto do patrimonio histórico e cultural do concello.

No acto que tivo lugar posteriormente no local social da Picota, Villamar, acompañado dos membros da candidatura Montse Fraga e Daniel Amarelo, así como do exalcalde de Ferrol Xaime Bello, defendeu a xestión das dúas concellerías xestionadas polo BNG neste mandato que remata e no que se priorizou “a axuda ás persoas que o están a pasar mal por mor da crise”, dixo. Blindados os servizos sociais, Villamar destacou o papel xogado polo BNG na área de Xestión Orzamentaria e Xestión Económica, que logrou reducir á metade a débeda bancaria que tiña o Concello en 2011 (daquela eran 12 millóns de euros), impulsou medidas de persecución da fraude fiscal e tomou decisións, engadiu, para controlar o gasto enerxético.

“A realidade do Concello de Narón é hoxe”, apuntou Villamar, “moi diferente da que nos atopamos cando chegamos ao goberno municipal, por moito que o Partido Popular se empeñe en mentir”. A ese respecto, explicou que o candidato do PP mente cando di que o investimento caeu nos últimos anos. “Nunca antes se investira tanto con fondos propios”, precisou Villamar, que lembrou que, a diferenza do que ocorría cando cogobernaba o Partido Popular, “hoxe non temos transferencias de capital de outras administracións, como os Fondos Feder, o Plan E, etc.” “Hoxe non falamos de cemento nin de obras faraónicas”, subliñou, “senón de persoas, de axudar as persoas”.

Villamar lembrou tamén que o único partido que subiu os impostos “foi o Partido Popular: subiu o IVE, subiu o IRPF e subiu tamén o IBI”, dixo. Nese sentido, explicou que “aínda que queiran enganar aos veciños de Narón, foi o PSOE quen fixo a revisión catastral de 2008 e o PP o que, cando chegou ao Goberno central, obrigou a subir os coeficientes do imposto, levando adiante ademais unha política inxerencista nas competencias municipais”.

O candidato do BNG-Asembleas Abertas participou tamén nun mitin no Val pola tarde e este domingo estará no local social de San Xosé Obreiro ás 13.00 horas e ás 21.00 horas no de Xuvia.