O BNG acusa ao goberno local de non atender as demandas en Santa Mariña

O Bloque Nacionalista Galego de Ferrol acusou na mañá deste martes, día 30, ao Goberno Local de Rey Varela de «permanecer pasivo e non aportar ningunha solución as demandas dos veciños e veciñas de Santa Mariña fronte as múltiples deficiencias do barrio que van desde a seguridade vial, a falla de mantemento de vías públicas, os problemas coa vía do ferrocarril ou a falla de mantemento das marxes da autoestrada que provocan importantes molestias na zona.

Como se lembrará o BNG ven reclamando solucións a todas estas problemáticas concretas do barrio, ven apoiando as mobilizacións veciñais e mesmo o pasado mes de xuño defendeu no pleno da corporación unha moción que recollía as demandas dos veciños e veciñas de Santa Mariña instando ao goberno local a arranxar e mellorar, de modo urxente, a seguridade na pasarela peonil sobre as vías de ferrocarril que une o barrio de Santa Mariña e o Ensanche A, previo a acometer unha reforma integral da mesma. Proposta que foi desestimada polo goberno municipal do Partido Popular.»

O BNG volve a insistir na súa proposta, debatida no pleno, que incorporaba e demandaba que o Goberno Local, en colaboración co ADIF, arranxe a zona do Loureiro e o Casquido solucionado os problemas provocados polos escorrementos de terra para a vía de Feve.

O BNG tamén reclama que se limpen de maleza e silvas os taludes do acceso norte en Santa Mariña que están a cubrir as vivendas colindantes aos mesmos e a limpeza do conxunto da zona de Santa Mariña.

O BNG lembra que no lugar dos loureiros, xa que en moitos tramos o firme comezou a ceder e mesmo existen riscos de desprendementos de terra no talude paralelo á vía do ferrocarril. O BNG quere que se proceda a consolidar esta vía mediante a prolongación do muro de contención existente e que remata, a día de hoxe, na rúa loureiro e que chegue até a conclusión da rúa Cardosas e que estas obras se acometan de modo inmediato polo que deben concretarse as xestións e actuacións a desenvolver coordenadamente entre o Concello e ADIF.