Conde chama ao traballo conxunto en favor do naval

O conselleiro de Economía e Industria, Francisco Conde, chamou ao traballo conxunto para que o naval galego “se posicione internacionalmente onde merece, cun produto moi avanzado tecnoloxicamente e cunha destacable diferenciación”.

Conde, que recordou que o Goberno galego aposta por un sector forte, competitivo e innovador, pediu á oposición que “deixen a demagoxia e suban ao barco dos esforzos produtivos”. “Prégolles que muden a súa postura para adoptar un verdadeiro espírito construtivo”, sinalou.

Destacou o conselleiro que “o apoio da Xunta ao sector naval é máis que un compromiso, e así o temos demostrado”. O conselleiro referiuse a feitos concretos como o acordo estratéxico coa petroleira Pemex, grazas á intensa labor comercial levada a cabo pola Xunta. Dentro desta alianza, tal e como recordou o conselleiro, xa se asinaron contratos para a construción dos floteis de Navantia e Barreras, e inclúense tamén avances para a construción de 25 embarcacións para a renovación da flota menor da petroleira, en colaboración con estaleiros de México. Ademais, tal e como remarcou Conde, o núcleo loxístico que se situará no Porto Exterior da Coruña suporá un evidente incremento de tráfico de buques “que poderán contar para o seu mantemento cun dos mellores centros de reparación naval do mundo”, en referencia a Navantia.

Tamén recordou Francisco Conde o traballo feito pola Xunta para conseguir un novo sistema de tax lease para volver poñer aos nosos estaleiros en igualdade de condicións que os do resto de Europa, así como a reactivación de Pymar, coa creación do novo Fondo de Garantías Patrimoniais.

Ademais, subliñou que durante a pasada lexislatura se puxeron a disposición das empresas do naval galego máis do 80 millóns de euros que fixeron posible a supervivencia de moitos estaleiros e da súa industria auxiliar, ademais de incentivar a innovación, fomentar a internacionalización, e mellorar a formación especializada.

“Temos que reafirmar os avances logrados e seguir traballando para colocar ao naval galego no lugar que se merece”, asegurou o conselleiro. Así, Conde, salientou que unha das principais liñas a seguir nesta lexislatura é o reforzo financeiro do sector, como queda de manifesto nos orzamentos aprobados onte, nos que se inclúe a mobilización de 60 millóns de euros en avais para os estaleiros galegos.

Por outra banda, tal e como apuntou Conde, reforzaranse as actuacións de diplomacia internacional, de maneira especial en Latinoamérica, co obxectivo de consolidar a carga de traballo. “Estamos traballando sen descanso por garantir a viabilidade do sector naval, dos seus estaleiros e, sobre todo, dos miles de familias que del dependen”, sinalou o conselleiro.