Galicia Ártabra Noticias de Ferrol y la comarca de Ferrolterra.
A Confederación Galega de Asociacións Veciñais distingue a súa traxectoria e compromiso co movemento veciñal, a proposta da Federación Veciñal Roí Xordo de Ferrol.
A Asociación de Veciños «Val de Esmelle» expresa a súa satisfacción polo recoñecemento concedido a Manuel Lorenzo Ramos nos XIII Premios COGAVE 2026 «Crer no Movemento Veciñal», organizados pola Confederación Galega de Asociacións Veciñais e celebrados este sábado en Pontevedra.
A distinción, proposta pola Federación Veciñal Roí Xordo de Ferrol, recoñece unha longa traxectoria de dedicación ao asociacionismo, á participación cidadá e á mellora das condicións de vida da veciñanza.
Manuel Lorenzo Ramos forma parte da historia do movemento veciñal de Esmelle desde os seus inicios. En 1979 participou na fundación da Asociación de Veciños «Val de Esmelle», integrando a súa primeira xunta directiva como secretario e asumindo posteriormente a presidencia da entidade.
Ao longo destas décadas mantivo un compromiso constante coa defensa dos intereses da parroquia e co desenvolvemento de iniciativas baseadas na participación e no traballo colectivo.
O Proxecto Esmelle, exemplo de participación veciñal
Un dos principais expoñentes desta traxectoria é o Proxecto Esmelle, posto en marcha en 2003 co obxectivo de recuperar, conservar e poñer en valor o patrimonio material e inmaterial da parroquia.
A través da implicación voluntaria da veciñanza, esta iniciativa permitiu recuperar muíños, fontes, camiños e espazos tradicionais, así como promover a conservación da memoria colectiva, o Museo Pérez Porto e a recuperación e divulgación do Castro de Esmelle.
O traballo desenvolvido durante máis de dúas décadas converteu o Proxecto Esmelle nun referente do asociacionismo rural, merecedor de numerosos recoñecementos, entre eles o accésit do Premio AGADER en 2005, a súa inclusión no catálogo de boas prácticas de Nacións Unidas en 2008, a Insignia de Ouro do Concello de Ferrol en 2009 e o Premio Nacional de Desenvolvemento Rural Macario Asenjo Ponce en 2014.
Un premio compartido con toda a veciñanza
Durante a súa intervención na entrega dos premios, Manuel Lorenzo Ramos agradeceu a distinción á COGAVE e á Federación Veciñal Roí Xordo, destacando que o recoñecemento non debía entenderse como un mérito exclusivamente persoal, senón como o resultado do esforzo de numerosas persoas que traballaron por Esmelle ao longo dos anos.
O homenaxeado tivo tamén un recordo especial para aqueles veciños e veciñas que participaron neste proxecto colectivo e que xa non están entre nós.
No seu discurso resumiu o espírito que guiou esta traxectoria cunha reflexión: «O verdadeiro valor do movemento veciñal está nas persoas, na solidariedade e na capacidade de traballar xuntas por un futuro mellor».
O orgullo dunha parroquia
Desde a Asociación de Veciños «Val de Esmelle» considérase que esta distinción representa tamén un recoñecemento ao traballo colectivo desenvolvido na parroquia durante case cinco décadas.
A entidade subliña que a traxectoria de Manuel Lorenzo Ramos exemplifica os valores que deron orixe á asociación: a solidariedade, o compromiso coa comunidade, a defensa do patrimonio e a participación activa da veciñanza na construción do futuro da parroquia.
Así mesmo, a asociación traslada o seu agradecemento á Confederación Galega de Asociacións Veciñais pola concesión do galardón e á Federación Veciñal Roí Xordo de Ferrol por propoñer a candidatura.
«Para Esmelle é un orgullo que se recoñeza a dedicación de Manuel Lorenzo Ramos. Este premio leva o seu nome, pero simboliza tamén o esforzo de xeracións de veciños e veciñas que demostraron que o traballo colectivo é capaz de transformar e mellorar unha parroquia».
A Asociación de Veciños «Val de Esmelle» felicita a Manuel Lorenzo Ramos por esta merecida distinción e reafirma o seu compromiso de continuar desenvolvendo os valores e proxectos que converteron Esmelle nun exemplo de participación veciñal.
