Galicia Ártabra Noticias de Ferrol y la comarca de Ferrolterra.
O festival reunirá música, danza e maxia o domingo 8 de novembro, ás 17:00 horas, no Centro Cívico de Canido, nunha cita presentada por Joaquín Enríquez e Rebeca Collado, coa recadación destinada á loita contra o cancro.
Gañadores e finalistas de distintas edicións de O Talentiño volverán subir ao escenario para unir talento e solidariedade. O Talentiño Solidario, un festival benéfico organizado coa colaboración da Asociación Veciñal de Canido, baixo o lema «O talento que nos une, a solidariedade que nos move», ofrecerá unha tarde de música, danza e maxia para recadar fondos destinados á loita contra o cancro e ao apoio ás persoas afectadas e ás súas familias.
A cita contará tamén coa presenza dos catro fundadores de O Talentiño: Lucía Pérez, Xabier Vizcaíno, Joaquín Enríquez e Eva Faraldo, que acompañarán os artistas nesta convocatoria solidaria no barrio onde naceu o certame. A presentación correrá a cargo de Joaquín Enríquez e Rebeca Collado, presentadores das galas de O Talentiño.
Un elenco que reúne o talento de distintas edicións
No apartado vocal participarán Sofía Hernández, gañadora da categoría de vocalistas de O Talentiño 2025, e Antía Barona, vencedora desta categoría en 2026. Xunto a elas actuarán Nuria Cornide e Sabela Castro, finalistas de vocalistas do certame.
A música instrumental chegará da man de Paula Seoane, gañadora da categoría de instrumentistas de O Talentiño 2025, que actuará ao piano, e de Xiana Ruiz, finalista desa mesma categoría e edición, que achegará ao festival o son da súa arpa.
O programa contará tamén con Julia Pérez, gañadora de O Talentiño en danza lírica en 2024, e con Meigo Simón, gañador da categoría de variedades do 2025, que sumará a súa maxia á xornada. A este elenco unirase Marcos Mella, o primeiro artista convidado da primeira edición de O Talentiño. A súa participación permitirá reencontrarse cun dos nomes que acompañaron o proxecto desde os seus inicios.
Dúas causas complementarias na loita contra o cancro
A totalidade da recadación destinarase a dúas entidades que desenvolven un labor complementario no ámbito oncolóxico. Por unha banda, apoiarase unha asociación de referencia na loita contra o cancro, cunha ampla traxectoria na promoción da investigación, a prevención e o acompañamento ás persoas diagnosticadas e ás súas familias, e con presenza activa en Ferrolterra.
Por outra, colaborarase con ASARGA, unha asociación dedicada aos sarcomas, un grupo de cancros pouco frecuentes que poden afectar aos ósos e aos tecidos brandos. Esta achega busca contribuír ao apoio ás persoas afectadas e dar visibilidade á necesidade de investigación e recursos para estas enfermidades.
Entrada inversa, vendas solidarias e sorteos
O festival contará cun sistema de entrada inversa, mediante o cal as persoas asistentes poderán realizar unha achega económica voluntaria en función das súas posibilidades. Ademais das actuacións, durante a tarde teremos compras e sorteos solidarios para sumar fondos á iniciativa.
Co apoio da Asociación Veciñal de Canido e de numerosas entidades, empresas e xente anónima que están a colaborar nos sorteos, O Talentiño quere facer desta cita un punto de encontro aberto á cidadanía, no que a cultura sirva tamén para acompañar, sensibilizar e colaborar.
A organización anima a veciñanza de Ferrol e da comarca a participar nesta tarde solidaria e a compartir cos artistas unha xornada na que cada achega, por pequena que sexa, contribuirá á loita contra o cancro.
