Galicia Ártabra Noticias de Ferrol y la comarca de Ferrolterra.
A deputada Mar García Vidal e a vicepresidenta do Consorcio das Mariñas, María Barral, inauguraron o encontro, no que participan un centenar de profesionais dos servizos sociais. A soidade non desexada entre as persoas maiores é un dos asuntos que centran a xornada.
A deputada de Política Social da Deputación da Coruña, Mar García Vidal, inaugurou no Pazo de Mariñán o XIII Encontro dos Servizos Sociais Comunitarios, nun acto no que tamén participou a vicepresidenta do Consorcio das Mariñas e alcaldesa de Betanzos, María Barral, e a alcaldesa de Bergondo, Alejandra Pérez. A xornada conta con preto dun centenar de profesionais e responsables políticos vinculados aos servizos sociais municipais e constitúe un espazo para compartir experiencias e abordar os retos da atención social desde os concellos.
Durante a súa intervención, Mar García recoñeceu o papel dos equipos municipais como primeira porta á que acoden moitas persoas e familias cando precisan apoio. “Vós sabedes o que custa, ás veces, pedir axuda. E sabedes tamén o importante que é atopar, nese momento, unha persoa que escoite, que explique e que acompañe”, afirmou.
A deputada subliñou que esa atención require coñecemento, sensibilidade e tempo, e defendeu a responsabilidade das administracións de facilitar os recursos necesarios. “Agradecer o voso compromiso está ben, pero temos que acompañalo de medios e de condicións para poder traballar mellor”, sinalou.
O encontro aborda tres cuestións directamente relacionadas co traballo diario dos servizos sociais: as soidade non desexada, especialmente entre as persoas maiores, a contratación pública e a intelixencia colectiva. Sobre a primeira delas, García Vidal chamou a prestar atención ás distintas formas de illamento e á necesidade de chegar a quen non solicita axuda ou deixa de participar na vida da comunidade.
“Necesitamos chegar tamén a quen non pide axuda, a quen non participa, a quen pouco a pouco vai desaparecendo da vida da comunidade”, destacou. Neste sentido, incidiu na importancia de favorecer que esas persoas recuperen vínculos e atopen espazos nos que sentirse parte da súa contorna.
En relación coa contratación pública, a deputada lembrou que as decisións administrativas teñen consecuencias concretas na vida das persoas usuarias, desde a continuidade da atención e os horarios ata a confianza co persoal que entra nos seus fogares. “Cando preparamos un contrato, temos que pensar tamén nesa casa e nesa persoa”, afirmou.
García Vidal destacou tamén o valor de compartir o coñecemento acumulado polos equipos e incorporar a experiencia das persoas usuarias para mellorar os servizos. “Escoitar os equipos profesionais dos servizos sociais e ás persoas usuarias axúdanos a tomar mellores decisións”, apuntou.
A responsable provincial de Política Social reiterou o compromiso da Deputación de acompañar os concellos, especialmente aqueles con menos recursos, e de atender as achegas dos profesionais que coñecen de primeira man as necesidades da poboación.
