Aprobada a convocatoria de 67 prazas de Persoal Docente e Investigador da UDC

Aprobouse o nomeamento como profesor emérito de Rafael Martín Acero.

A sesión ordinaria do Consello de Goberno da Universidade da Coruña celebrada este mércores 30 contou coa presenza das novas persoas integrantes neste órgano, tras a remodelación do equipo reitoral e os cambios nalgúns departamentos. Así, ao inicio da xuntanza, o reitor da UDC, Ricardo Cao, deu a benvida a María Hernández, xerenta ; Bruno Casal, vicerreitor de Economía e Planificación Estratéxica; Belén Montero, directora do CITENI; Javier de Toro, director do Departamento de Medicina e Alberto Varela, director do Departamento de Enxeñaría Civil.

Nesta sesión foi aprobada a convocatoria de 67 prazas de Persoal Docente e Investigador (PDI), unha medida destinada a reforzar o cadro de persoal da institución, favorecer a promoción académica e contribuír á captación e estabilización do talento investigador.

A convocatoria, integrada na súa meirande parte na OEP correspondente ao ano 2026, inclúe 17 prazas de catedrático/a de universidade mediante promoción interna, 17 prazas de profesor/a titular de universidade e 33 prazas de persoal permanente laboral, en consonancia coa taxa de reposición permitida polas normativas estatal e autonómica en materia de persoal.

Entre as prazas previstas, cinco estarán reservadas para a incorporación de persoal investigador doutor que superase a avaliación do Programa de Incentivación da Incorporación e Intensificación da Actividade Investigadora (I3), unha medida orientada a fortalecer a capacidade investigadora da institución e favorecer a consolidación de traxectorias académicas de excelencia.

Con esta convocatoria, a UDC continúa avanzando na súa estratexia de fortalecemento do persoal docente e investigador, apostando pola estabilidade, a promoción do talento interno e a excelencia académica e científica como piares fundamentais da súa actividade.

No eido de persoal, foi aprobado o nomeamento como profesor emérito de Rafael Martín Acero, catedrático na Facultade de Ciencias do Deporte e Educación Física e investigador no grupo ACoM (Aprendizaxe e control do
movemento humano en actividade física e deporte).

Financiamento e Medicina
No seu informe, o reitor fixo análise de situación de diversos temas, entre os que destacou o inicio dos traballos para a elaboración do próximo Plan de Financiamento, que deberá estar en vigor 1 de xaneiro de 2028. Un período no
que, incidiu Cao, “as universidades debemos contar con maior financiamento estrutural”. Así mesmo, fixo referencia ao encontro que esta tarde manterá o propio reitor e máis as reitoras da USC e a UVigo, co conselleiro de Educación, Ciencia e Formación Profesional. Unha reunión na que se analizará a proposta da Xunta sobre os cambios propostos para modificar a Lei de Universidades.

En materia de titulacións, destacou o protocolo asinado coa Universidade de Tecnoloxía de Anhui para impulsar dobres titulacións do ámbito tecnolóxico cos Graos en Ciencia e Enxeñaría de Datos, en Enxeñaría Mecánica e en Enxeñaría Electrónica, Industrial e Automática. A proposta xa foi supervisada polas autoridades académicas da provincia chinesa de Anhui, e a documentación atópase na fase final de preparación para ser enviada ao Ministerio competente da República Popular da China. Ao longo dos vindeiros meses está prevista a sinatura dos correspondentes convenios que permitirán que profesorado da UDC viaxe a China para impartir docencia nesas titulacións, por períodos de, aproximadamente, 5 semanas consecutivas, así como que o estudantado chinés poida obter o título por ambas as dúas universidades. 

Polo que se refire á descentralización de Medicina, o reitor informou que xa entrou en vigor o Regulamento que prevé a constitución das Unidades Docentes (do CHUAC e do CHUVI) e a elección das persoas que as coordinen
deberá estar no prazo dun mes. Lembrou que actualmente está en marcha o proceso de contratación das catro prazas de PACS (nos servizos de Anestesioloxía, Atención Primaria, Urxencias e Pneumoloxía) para a cobertura da docencia práctica clínica de 5º curso descentralizada no ámbito territorial da UDC.