Galicia Ártabra Noticias de Ferrol y la comarca de Ferrolterra.
As asembleas de traballadores e traballadoras da industria auxiliar de Navantia aprobaron a pasada semana aceptar a proposta da patronal para a modificación da disposición adicional segunda.
Despois de que os sindicatos presentaran á AENFE e á Dirección de Navantia o pasado mes de decembro unha proposta para modificar os coñecidos como acordos do naval, e despois de manter varias reunións entre a parte social e as empresas do naval, o pasado xoves e venres someteuse á asemblea xeral o texto proposto polos empresarios.
Celebradas cinco asembleas nas distintas quendas e nos dous estaleiros da Ría de Ferrol, finalmente esta proposta foi ratificada pola maioría dos cadros de persoal da industria auxiliar.
Dende a parte social destácase a unificación de táboas, rematando así co que consideran «unha discriminación salarial histórica entre as persoas traballadoras»; así mesmo a incorporación do plus a categorías que até agora non o cobraba; e o incremento por riba do convenio colectivo para aquelas categorías máis baixas son as tres patas que destacan os sindicatos que participaron na negociación. Recoñece a parte social que esa proposta non recolle a totalidade das demandas da industria auxiliar, pero poñen en valor o avance que supón nas condicións salariais dos traballadores e traballadoras do naval.
Unha vez máis, os sindicatos queren destacar que isto foi posible polo éxito das xornadas de folga durante a negociación do convenio de sidero e que presionaron a patronal do naval de Ferrol.
