Un centenar de alumnos da Agasp percorreron o tramo do Camiño Inglés en Narón

Uns 90 integrantes da Academia Galega de Seguridade Pública (Agasp), entre os que dous virán para Narón, Patricia Blanco Carballo e Juan Sánchez Sanjurjo, iniciaron o Camiño Inglés cara a Compostela dende o veciño municipio de Ferrol.

Ao seu paso polo paseo marítimo de Xuvia, nas inmediacións do punto que marca o quilómetro 100 a Compostela, foron recibidos polo concelleiro de Seguridade Cidadá, José Oreona, o xefe da Policía Local, Eduardo Pita, e o oficial José Antonio Carballido. O concelleiro de Seguridade Cidadá deulles a benvida á cidade e conversou con algúns deles, varios da comarca, desexándolles a todos eles un bo camiño.

Os futuros axentes da Policía Local camiñarán durante catro xornadas, pernoctando nas instalacións da Agasp, e chegarán este venres a Compostela, segundo as previsións. Aos poucos días de rematar o camiño incorporaranse aos seus concellos de destino, donde traballarán dende xullo ata setembro, incluídos, antes de regresar novamente á Academia para rematar a súa formación.